تمل ناڈو میں بارش نے تباہی مچائی، اسکول اور کالج بند، پروازیں اور ٹرینیں منسوخ

تمل ناڈو میں موسلادھار بارش نے لوگوں کا نظام زندگی درہم برہم کر دیا ہے۔ تمل ناڈو کے چار اضلاع شدید بارش اور سیلاب جیسی صورتحال سے سب سے زیادہ متاثر ہوئے ہیں۔ یہ چار اضلاع ترونیل ویلی، توتیکورن، ٹینکاسی اور کنیا کماری ہیں۔ توتیکورن ضلع کے تروچندر میں صبح 1:30 بجے تک صرف 15 گھنٹوں میں 60 سینٹی میٹر بارش ہوئی۔ ترونیل ویلی ضلع کے پالیم کوٹائی میں 26 سینٹی میٹر بارش ریکارڈ کی گئی ہے۔ اس دوران کنیا کماری میں 17.3 سینٹی میٹر بارش ہوئی ہے۔

طوفانی بارشوں کے باعث متاثرہ اضلاع میں پیر (18 دسمبر) کو عام تعطیل کا اعلان کیا گیا ہے۔ اس دوران اسکول، کالج، بینک، نجی ادارے اور پبلک سیکٹر کمپنیاں بھی بند رہیں گی۔ شدید بارشیں ہی نہیں بلکہ ڈیم سے چھوڑا جانے والا پانی بھی لوگوں کے لیے پریشانی کا باعث بن گیا ہے۔

وزیر اعلی  ایم کے اسٹالن نے بھاری بارش سے متاثرہ علاقوں میں راحت اور بچاؤ کے کاموں کے لیے وزراء اور سینئر بیوروکریٹس کو تعینات کیا ہے۔ ہر ضلع کی نگرانی کے لیے ایک سینئر بیوروکریٹ کو مقرر کیا گیا ہے۔ اسٹالن نے ضلعی کلکٹروں کو حساس علاقوں میں امدادی مراکز اور کشتیوں کو تیار رکھنے اور ضرورت پڑنے پر لوگوں کو فوری طور پر وہاں سے نکالنے کی ہدایت بھی کی ہے۔ نشیبی علاقوں سے لوگوں کو نکالنے کا کام بھی جاری ہے۔

ریاست کے جنوبی اضلاع میں سیلاب جیسی صورتحال پیدا ہوگئی ہے۔ راجدھانی چنئی اور آس پاس کے تین اضلاع اس ماہ کے شروع میں آنے والے طوفان کی وجہ سے ہونے والی تباہی سے ابھی بھی ٹھیک سے ابھر نہیں پائے ہیں۔