ایس سی-ایس ٹی ذیلی منصوبہ بحال کیا جائے: کانگریس

نئی دہلی: کانگریس نے شیڈولڈ کاسٹ شیڈولڈ ٹرائب فرقہ کے لیے بجٹ الاٹمنٹ کم کرنے کا الزام لگاتے ہوئے آج کہا کہ حکومت کو ایس سی/ایس ٹی ذیلی منصوبہ بحال کرنا چاہیے تاکہ محروموں کو بھی ترقی کا فائدہ مل سکے۔

کانگریس کے پی ایل پونیا نے ایوان میں مالی سال 2020-21 کے عام بجٹ پر بحث میں حصہ لیتے ہوئے کہا کہ ہندوستانی معیشت تیزی سے ترقی کر رہی ہے لیکن اس ترقی کا فائدہ ایس سی/ایس ٹی فرقہ کو نہیں مل رہا ہے۔ پہلے ہر وزارت کے الاٹمنٹ میں ذیلی اسکیم کے تحت ایس سی ایس ٹی کے لیے الگ سے الاٹمنٹ ہوتا ہے لیکن حکومت نے اس نظام کو ختم کردیا ہے۔

انہوں نے کہا کہ بجٹ میں ایس سی/ایس ٹی کے لیے الاٹمنٹ میں مسلسل کمی کی جارہی ہے۔ سماجی انصاف اور امپاورمنٹ کی وزارت کے علاوہ کسی دیگر وزارت کے ذریعہ ایس سی/ایس ٹی کے لیے پیسہ خرچ نہیں کیا جا رہا ہے۔ اس لیے حکومت کو ایس سی/ایس ٹی ذیلی اسکیم کو بہال کردینا چاہیے۔ جس سے محروموں کو بھی ترقی کا فائدہ مل سکے۔

کانگریس کے رپون بورا نے کہا کہ یہ بجٹ عوام کی امنگوں کو پورا نہیں کررہا ہے۔ حکومت اپنے پرانے وعدے پورے نہیں کررہی ہے اور نئے وعدے کیے جارہے ہیں۔ حکومت کے پاس اسکیموں اور پروگراموں کو پورا کرنے کے لیے کوئی نظم نہیں ہے۔ کسانوں کی آمدنی دوگنی کرنے کا اعلان پورا ہوتا نہیں دکھائی دے رہا ہے کیوں کہ حکومت کی پالیسیوں سے زرعی لاگت بڑھتی جارہی ہے۔

انہوں نے کہا کہ حکومت ایسے وعدے کر رہی ہے جنہیں پورا کرنا ممکن نہیں ہے۔ بجٹ میں 27000 کلومیٹر ریل لائن کی بجلی کاری کا اعلان کیا گیا ہے جب کہ گزشتہ سال صرف چھ ہزار کلومیٹر ریل لائن کی بجلی کاری ہی ممکن ہوئی ہے۔ انہوں نے کہا کہ روزگار کے مواقع ختم ہو رہے ہیں۔ نوجوان بے روزگار ہو رہے ہیں۔ حکومت کو نوجوانوں کے اسکل ڈیولپمنٹ پر زور دینا چاہیے لیکن اس کے لئے صرف تین ہزار کروڑ روپے الاٹ کیے گئے، یہ ناکافی ہے۔