ایس سی-ایس ٹی قانون: سپریم کورٹ کا حکم امتناعی جاری کرنے سے انکار

سپریم کورٹ نے ایس سی-ایس ٹی ایکٹ میں ترمیم کے اپنے حالیہ فیصلے پر روک لگانے سے انکار کر دیا ہے۔ کھلی عدالت میں مرکزی حکومت کی نظر ثانی کی درخواست پر سماعت کرتے ہوئے سپریم کورٹ نے اپنے فیصلے پر روک لگانے سے انکار کرتے ہوئے تمام فریقوں کو 2 دن کے اندر تفصیلی جواب دائر کرنے کو کہا ہے۔ عدالت عظمیٰ میں معاملہ کی اگلی سماعت دس دن کے بعد ہوگی۔

مرکزی حکومت نے پیر کے روز سپریم کورٹ سے درخواست کی تھی کہ وہ اپنے حال ہی میں سنائے گئے ایس سی- ایس ٹی قانون پر مبنی فیصلہ کا جائزہ لیں۔ وزیر قانون روی شنکر پرساد نے کہا کہ مرکزی حکومت سپریم کورٹ کے فیصلے میں کوئی فریق نہیں ہے اور وہ اس فیصلے کے پیچھے دئیے گئے دلائل سے متفق نہیں ہیں۔ انہوں نے کہا کہ حکومت نے اس مسئلے پر ایک مجموعی نظر ثانی کی درخواست دائر کی ہے۔

وہیں اس فیصلے کے خلاف پیر کو دلت گروپوں کی طرف سے بلائے گئے بھارت بند کے دوران ملک بھر میں وسیع پیمانے پر تشدد ہوا جس میں 13 افراد ہلاک ہوئے ہیں۔ پولس اور مظاہرین کے درمیان جھڑپوں میں 100 سے زیادہ افراد زخمی بھی ہوئے ہیں۔ مدھیہ پردیش، راجستھان، پنجاب، اتر پردیش، ہریانہ، اوڈیشہ ، گجرات، جھارکھنڈ اور مہاراشٹر ریاستیں تحریک سے سب سے زیادہ متاثر ہوئیں۔ مدھیہ پردیش میں ہلاک ہونے والوں کی تعداد 7 ہو چکی ہے۔

منگل کے دن بھی کئی شہروں میں تشدد کا اثر دیکھنے کو ملا ۔ مدھیہ پردیش اور اتر پردیش کے کئی شہروں میں حالات معمول پر نہیں ہیں۔ گوالیار، مرینا اور بھنڈمیں کرفیو جاری ہے۔ اتر پردیش میں انتظامیہ الرٹ پر ہے اورمیرٹھ ضلع میں احتیاطاً انٹرنیٹ خدمات معطل رکھی گئی ہیں۔ کئی شہروں میں اسکول بند رکھے گئے۔ میرٹھ شہر کے حالات چونکہ سب سے زیادہ خراب رہے تھے اسی کے پیش نظر انتظامیہ نے 12 ویں تک کے تمام اسکول، کالج بند رکھنے کی ہدایات جاری کی ہے۔