سنیوکت کسان مورچہ نے یوگیندر یادو کو ایک ماہ کے لئے کیوں معطل کیا؟

ایک ماہ تک یوگیندر یادو کسان مورچہ کا حصہ نہیں رہیں گے کیونکہ سنیوکت کسان مورچہ نے ان کو ایک ماہ کے لئے کسان مورچہ سے معطل کر دیا ہے۔کسان مورچہ نےیوگیندر یادو کے خلاف یہ کارروائی اس لئے کی کیونکہ یادو لکھیم پور تشدد کے بعد بی جے پی کے کارکن شبھم مشرا کے گھر گئے تھے اور شبھم کے گھرا والوں سے مل کر ہمدردی کا اظہار کیا تھا۔

واضح رہے یوگیندر یادو کے اس قدم کے بعد سے پنجاب کی کسان تنظیمیں ان کے خلاف کارروائی کا مطالبہ کر رہی تھیں جس کی وجہ سے کسان مورچہ کو یہ فیصلہ لینا پڑا۔

واضح رہے لکھیم پور تشدد میں مارے گئے شبھم مشرا کے گھر جانے کے بعد یوگیندر یادو نے اپنے ٹویٹر پر کچھ تصاویر ساجھا کی تھیں اور انہوں نے ٹویٹ میں لکھا تھا ’’شہید کسانوں کو خراج عقیدت پیش کرنے کے بعد واپسی پربی جے پی کے کارکن شبھم مشرا کے گھر گیا۔ شبھم کے گھر والوں نے ہم پر غصہ نہیں کیابس دکھی دل سے یہ سوالات پوچھے۔ کیا ہم کسان نہیں ہیں؟ہمارے بیٹے کا کیا قصور تھا؟ آپ کے ساتھی نے ایکشن ری ایکشن والی بات کیوں کہیں ؟ ان کے سوال میرے کان میں گونج رہے ہیں۔‘‘

واضح رہے تین اکتوبر کو اتر پردیش کے لکھیم پور کھیری میں احتجاج کر رہے کسانو ں پر ایک گاڑی چڑھا دی گئی تھی جس میں کسان مارے گئے تھے۔ اس کے بعد تشدد میں آ ٹھ لوگوں کی موت ہو گئی تھی جس میں چار کسان ، ایک صحافی اور بی جے پی کارکنان کی موت ہو گئی تھی ۔ اس معاملہ میں مرکزی وزیر مملکت برائے داخلہ امور اجے مشراٹینی کے بیٹے کے اوپر الزام ہیں اور ان کو بعد میں پولیس نے گرفتار کرلیا تھا۔