سنیوکت کسان مورچہ کی ٹیم نے گرودوارا بنگلہ صاحب میں ماتھا ٹیکا

زرعی اصلاحات قوانین کے خلاف شروع کی گئی تحریک کے ذریعہ انہیں واپس کرانے میں کامیابی ملنے پر سنیوکت کسان مورچہ کی ٹیم جمعہ کو دہلی کے تاریخی گردوارہ بنگلہ صاحب گئی جہاں اس نے اپنا ماتھا ٹیکا۔کسانو ں نے حکومت کی یقین دہانی کے بعد ہی اپنا مظاہرہ ختم کیا ہے اور اب تمام مظاہرین اپنے اپنے گھروں کو واپس ہو گئے ہیں۔

دہلی سکھ گوردوارہ مینجمنٹ کمیٹی (ڈی ایس جی ایم سی) کی جانب سے سنیوکت کسان مورچہ کی ٹیم کا اعزازکیاگیا۔ ڈی ایس جی ایم سی کے جنرل سکریٹری ہرمیت سنگھ کالکا اور دیگر عہدیداروں نے کسان لیڈر بلبیر سنگھ راجیوال، راکیش ٹکیت اور دیگر تمام کسان لیڈروں کا سروپاڈال کراستقبال کیا۔

مسٹر کالکا نےاس موقع پر ہوئے سماگم میں کہا کہ گرو صاحب کی بےپناہ بخشش اور رحمت کے سبب کسان مورچے کی جیت ہوئی ہے۔ محاذ کے قائدین اور اس میں شامل کسانوں کے ثابت قدم جذبے نے اس محاذ کو کامیاب بنایا۔ اگرچہ حکومتوں نے بھی اس محاذ کو ختم کرنے کے لیے مظالم کا راستہ اختیار کرنے کی کوشش کی لیکن اس مورچہ میں شامل ہر فرد نے بہادری سے مقابلہ کیا۔ انہوں نے کہا کہ اس مورچے میں جیت یا ہار کسی کو نیچا دکھانے کے لیے نہیں تھی بلکہ صرف اپنے وجود کی لڑائی تھی۔