’اپنے اجداد کو سلام جنہوں نے ہمیں جمہوریت کی روح، ہمارا آئین فراہم کیا‘ کانگریس لیڈران کی یوم جمہوریہ پر مبارکباد

نئی دہلی: ملک کے 74ویں یوم جمہویہ کے موقع پر انڈین نیشنل کانگریس اور اس کے لیڈران کی جانب سے ہم وطنوں کو مبارک باد پیش کی گئی ہے۔ کانگریس صدر ملکارجن کھڑگے نے اس موقع پر کہا کہ آج بھائی چاہرہ، سیکولرازم اور سوشلزم کے تحفظ کی سب سے زیادہ ضرورت ہے۔ وہیں، کانگریس کے سابق صدر راہل گاندھی نے ملک کے آئین کی خصوصیات کو بیان کیا۔

یومِ جمہوریہ کے موقع پر کانگریس کے صدر ملکارجن کھڑگے نے ٹوئٹ کیا، ’’74ویں یوم جمہوریہ کے موقع پر ملک کے تمام باشندگان کو دلی مبارکباد۔ آج ہمیں سب سے زیادہ ضرورت آئین کے بنیادی اصولوں انصاف، برابری، آزادی، باہمی بھائی چارہ، سیکولرازم اور سوشلزم کو بچانے کی ہے۔ جے ہند۔‘‘

تمل ناڈو کے کنیا کمار سے کشمیر تک کانگریس کی ’بھارت جوڑو یاترا‘ کی قیادت کر رہے راہل گاندھی نے بھی یوم جمہوریہ کے موقع پر ٹوئٹ کیا ہے۔ انہوں نے کہا ’’اتحاد، ہم آہنگی، مساوات اور خود مختاری- ہمارے آئین کے بنیادی ستون اور ہمارے آئین کی روح ہیں۔‘‘

انڈین نیشنل کانگریس کی جانب سے ٹوئٹ کیا گیا ’’ہمارے 74 ویں یوم جمہوریہ پر ہم اپنے آبا و اجداد کو سلام کرتے ہیں جنہوں نے ہمیں جمہوریت کی روح، ہمارا آئین فراہم کیا۔ آج ہم ہر ہندوستانی شہری کو مبارکباد دیتے ہیں اور انصاف، آزادی، مساوات اور بھائی چارے کی حفاظت کا عہد کرتے ہیں، جو ہماری متحرک جمہوریہ کے قلب میں ہے۔"

راجستھان کے وزیر اعلی اشوک گہلوت نے 74 ویں یوم جمہوریہ کے موقع پر آج صبح وزیر اعلی کی رہائش گاہ پر قومی پرچم لہرایا۔ وزیر اعلیٰ کو کمپنی کمانڈر پپیتا سومرا کی قیادت میں آر اے سی کی ٹکڑی نے سلامی دی۔ اس موقع پر وزیر اعلیٰ گہلوت سبھی کو یوم جمہوریہ کی مبارکباد اور نیک خواہشات پیش کیں۔ اس موقع پر وزیر اعلیٰ آفس اور وزیر اعلیٰ کی رہائش گاہ کے تمام افسران اور ملازمین موجود تھے۔