بابر پور ضلع کانگریس کمیٹی کے جنرل سکریٹری سلیم احمد نے چودھری زبیر احمد کا کیا پرتپاک استقبال

نئی دہلی: بابر پور ضلع کانگریس کمیٹی کے نو منتخب جنرل سکریٹری سلیم احمد کی جانب سے بابر پور اسمبلی حلقہ کے نئی کردم پوری وارڈ میں ایک پروقار استقبالیہ تقریب کا انعقاد کیا گیا۔ اس تقریب میں ضلع صدر چودھری زبیر احمد کو ان کی بہترین حکمت عملی اور مضبوط قیادت کیلئے شکریہ ادا کیا گیا۔ پروگرام کی صدارت خود زبیر احمد نے کی اور نظامت کے فرائض کانگریس پارٹی کے سینئر لیڈر راجیو کوشک نے بحسن و خوبی ادا کیے۔

اس موقع پر چودھری زبیر احمد نے کہا کہ آپ لوگوں کا ساتھ اور ہم سب کی محنت کی بدولت ہم  بابر پور ضلع کو کانگریس پارٹی کے لیے سب سے مضبوط ضلع بنانے میں کامیاب ہو پائے ہیں۔ ابھی ہمیں مزید محنت کرنے کی اشد ضرورت ہے کیونکہ ہمارے علاقوں میں جو ترقیاتی کام ہونے تھے وہ ابھی تک نہیں ہو پائے ہیں۔ پچھلے دس سالوں میں یہاں کے عوام نے جس پارٹی کو جھولی بھر بھر کر ووٹ دیے تھے اور اعتماد کیا تھا اس پارٹی نے ترقی کے نام پر علاقوں میں اس پیمانے پر کام نہیں کیا جو دس سالوں میں ہوجانے چاہئے تھے۔ آج کے لوگ سمجھ دار ہیں وہ سب جانتے ہیں کہ کون ان کے مسائل کے تئیں فکر مند ہے اور مصیبت میں کون کام آتا ہے۔

زبیر احمد نے زور دیتے ہوئے کہا کہ ہمارے ضلع میں کانگریس کا ووٹ فیصد جس تیزی کے ساتھ بڑھا ہے اس سے اندازہ لگایا جا سکتا ہے کہ آنے والے دہلی اسمبلی الیکشن 2025 میں کانگریس پارٹی کامیاب ہوگی۔ انہوں نے مزید کہا کہ بابر پور ضلع کانگریس کمیٹی کا ایک ایک کارکن اپنی ذمّہ داری نہ صرف بخوبی نبھا رہا ہے بلکہ نئے نئے لوگوں کو کانگریس پارٹی سے جوڑنے کا کام بھی کر رہا ہے۔

پروگرام کے روحِ رواں سلیم احمد نے کہا کہ جب سے بابر پور ضلع کانگریس کمیٹی کی کمان چودھری زبیر احمد نے سنبھالی ہے، تب سے ضلع میں متحد ہونے کی فضا قائم ہوئی ہے۔ زبیر احمد ہر لیڈر اور کارکن کی بات کو سنتے ہیں اور پارٹی کے حق میں سوچ کر فیصلہ لیتے ہیں۔ ان کی اسی خوبی کی وجہ سے ضلع میں کانگریس پارٹی کا کارواں دن بہ دن بڑھتا جا رہا ہے۔ انہوں نے یقین دلایا کہ آنے والے اسمبلی الیکشن کی تیاری ہم نے ابھی سے شروع کر دی ہے۔ اس کے مثبت نتائج ضرور دیکھنے کو ملیں گے۔

اس تقریب میں عشرت علی، محمد شاہنواز، راجیو کوشک نے بھی اپنے خیالات کا اظہار کیا۔ اہم شرکاء میں ڈیلی گیٹ سید ناصر جاوید، راجیو کوشک، عشرت علی، لکھن لال شرما، محمد شاہنواز، دیویندر پنڈت، جتندر شرما، نفیس علی، سعید پردھان، منّا چاچا، الطاف بھائی، نلن کوشک، ارشاد کسّار، عابد ادریسی، ظفر چودھری کا نام قابل ذکر ہے۔