پہلوانوں کے مظاہرہ کو لے کر افواہوں کا دور جاری، ریسلرس نے وضاحتی بیان میں کہا ’تحریک ختم نہیں ہوئی‘

ریسلنگ فیڈریشن آف انڈیا (ڈبلیو ایف آئی) کے چیف اور بی جے پی رکن پارلیمنٹ برج بھوشن شرن سنگھ کے خلاف مظاہرہ کر رہے پہلوانوں کی تحریک کو لے کر افواہوں کا بازار گرم نظر آ رہا ہے۔ دراصل مظاہرہ میں شامل پہلوان ساکشی ملک اور بجرنگ پونیا کو لے کر خبر سامنے آئی کہ ان لوگوں نے اپنے ریلوے کی ملازمت جوائن کر لی ہے۔ اس کے بعد کہا جانے لگا کہ تحریک ختم ہونے کے دہانے پر ہے۔

اس معاملے میں اب ساکشی ملک اور بجرنگ پونیا نے وضاحتی بیان دیا ہے۔ دونوں ریسلرس نے ٹوئٹ کر جانکاری دی ہے کہ تحریک ختم ہونے کی خبریں بے بنیاد ہیں۔ یہ تحریک ابھی ختم نہیں ہوئی ہے۔ دراصل پہلوان ساکشی ملک اور بجرنگ پونیا کو لے کر خبر رساں ایجنسی اے این آئی نے پیر کے روز جانکاری دی کہ انھوں نے انڈین ریلوے کی اپنی ملازمت پھر سے جوائن کر لی ہے۔ اس خبر کے سامنے آنے کے بعد دعویٰ کیا جانے لگا کہ ساکشی ملک نے پہلوانوں کے دھرنا و مظاہرہ سے خود کو الگ کر لیا ہے۔

افواہوں کا بازار گرم ہوتا دیکھ کر ساکشی ملک نے فوراً ٹوئٹ کیا اور کہا کہ ’’یہ خبر بالکل غلط ہے۔ انصاف کی لڑائی میں نہ ہم میں سے کوئی پیچھے ہٹا ہے، نہ ہٹے گا۔ ستیاگرہ کے ساتھ ساتھ ریلوے میں اپنی ذمہ داری کو ساتھ نبھا رہی ہوں۔ انصاف ملنے تک ہماری لڑائی جاری ہے۔ برائے کرم کوئی غلط خبر نہ چلائی جائے۔‘‘ ساکشی نے پیر کے روز یہ بھی کہا کہ ’’ہم نے مرکزی وزیر داخلہ امت شاہ سے ملاقات کی۔ یہ ایک عام بات چیت تھی، ہمارا صرف ایک ہی مطالبہ ہے اور وہ ہے انھیں (برج بھوشن سنگھ) گرفتار کریں۔‘‘

دوسری طرف پہلوان بجرنگ پونیا نے بھی اپنے ایک ٹوئٹ میں تحریک ختم نہ ہونے کی وضاحت کی ہے۔ انھوں نے لکھا ہے کہ ’’تحریک واپس لینے کی خبریں محض افواہ ہیں۔ یہ خبریں ہمیں نقصان پہنچانے کے لیے پھیلائی جا رہی ہیں۔ ہم نہ پیچھے ہٹے ہیں اور نہ ہی ہم نے تحریک واپس لی ہے۔ خاتون پہلوانوں کی ایف آئی آر اٹھانے کی خبر بھی جھوٹی ہے۔ انصاف ملنے تک لڑائی جاری رہے گی۔‘‘ واضح رہے کہ نابالغ کے ذریعہ ایف آئی آر واپس لیے جانے کی خبریں بھی میڈیا میں چل رہی ہیں۔ اس طرح کی خبروں کو بجرنگ پونیا کے ساتھ ساتھ ساکشی ملک نے بھی فرضی قرار دیا ہے۔