یوپی میں کتے پالنے والوں کے لئے وضع کئے گئے اصول، رجسٹریشن کرانا لازمی

لکھنؤ: اتر پردیش میں شہری ترقی کے محکمے نے کتوں کے رجسٹریشن کے سلسلے میں تمام شہری بلدیاتی اداروں کو ایک ہدایت نامہ جاری کیا ہے۔ جس کے مطاب ریاست میں اپنے پالتو کتوں کے رویے کے لئے اب مالکان ذمہ دار ہوں گے۔ رپورٹ کے مطابق اب کتے کے مالکان کو بلدیاتی اداروں کو یقین دہانی کرانی ہوگی کہ ان کے ان کے پالتو جانور سے عوام میں کوئی پریشانی نہیں ہوگی۔

عہدیداروں نے کہا کہ یہ فیصلہ اس لئے لیا گیا ہے کیونکہ ریاست میں گزشتہ چند مہینوں میں خونخوار کتوں کے حملوں کے کئی واقعات سامنے آئے ہیں۔ بریڈرز، ریذیڈنٹ ویلفیئر ایسوسی ایشنز اور بڑی تعداد میں آوارہ کتوں کو گود لینے والے افراد کے لئے متعدد اصول نافذ کئے گئے ہیں۔ آوارہ کتوں کا رجسٹریشن بغیر کسی فیس کے کیا جائے گا۔

لکھنؤ نئے اصولوں کو وضع کرنے والا ریاست کا پہلا شہر بننے جا رہا ہے۔ لکھنؤ میونسپل کارپوریشن کے عہدیداروں نے کہا کہ آنے والے دنوں میں کتوں کے رجسٹریشن کی اجازت دیتے ہوئے حکومت کی طرف سے تیار کردہ نئے معیاری آپریٹنگ طریقہ کار کو نافذ کیا جا رہا ہے۔ یہ پالیسی نوئیڈا پر لاگو نہیں ہوگی، کیونکہ وہ ایک صنعتی علاقہ ہے، جو انڈسٹریز ڈیولپمنٹ ڈیپارٹمنٹ کے زیر انتظام ہے اور کتوں کے مالکان کے لئے اس کے اپنے اصول ہیں۔

جبکہ آوارہ کتوں کا رجسٹریشن بغیر کسی فیس کے ساتھ کیا جائے گا، نیز اس کی نس بندی بھی کی جائے اور پہلا ٹیکہ بھی لگایا جائے گا۔ پانچ یا اس سے زیادہ آوارہ کتوں کو گود لینے والے افراد اور رہائشی گروپوں کو شیلٹر ہومز کے برابر رکھا جائے گا اور انہیں اینیمل ویلفیئر بورڈ آف انڈیا کے ذریعہ وضع کردہ رہنما خطوط پر عمل کرنا ہوگا۔

خیال یہ ہے کہ کتوں کے مالکان کو ان کے پالتو جانوروں کی حرکات کے لئے جوابدہ قرار دیا جائے اور اگر آوارہ کتوں سے محبت کرنے والے افراد انہیں اپنی کالونی میں رکھنے کی خواہش رکھتے ہیں کو انہیں بھی اتنا ہی چوکنا رہنا ہوگا۔

پالتو جانور کو رجسٹر کرنے والے شہری ادارے کو کتے کے مالک کو ایک چپ یا ٹوکن بھی دینا ہوگا، جس میں پالتو جانور کا رجسٹریشن نمبر، مالک کا نام، پتہ اور رابطہ نمبر درج ہوگا۔ جب کتے کو چہل قدمی یا دیگر معمولات کے لئے باہر لے جایا جائے گا تو چپ کو کالر کے ساتھ لگانا لازمی ہوگا۔

اگر کوئی کتا سڑک پر یا گھر کے باہر کسی عوامی جگہ پر چپ کے بغیر پایا جاتا ہے تو میونسپل حکام کو ایسے کتوں کو پکڑ کر حکومت کے زیر انتظام پناہ گاہوں میں لے جانے کا اختیار دیا گیا ہے۔ محکمہ شہری ترقی کے ایک سینئر افسر نے بتایا کہ بلدیاتی ادارے فیصلہ کریں گے کہ جرمانے کی ادائیگی پر کتوں کو ان کے مالکان کے حوالے کرنا ہے یا نہیں؟