’آر ٹی آئی نے پانی سے متعلق کیجریوال کے جھوٹے وعدے کی قلعی کھول دی‘، کانگریس کا دہلی حکومت پر حملہ

کانگریس کے سینئر ترجمان ڈاکٹر نریش کمار نے ایک آر ٹی آئی کے ذریعہ دہلی کے وزیر اعلیٰ اروند کیجریوال کے ذریعہ پانی سے متعلق کیے گئے وعدے کی قلعی کھول دی ہے۔ انھوں نے الزام عائد کیا ہے کہ کیجریوال دہلی کو 700 لیٹر پانی مفت دینے کی بات کرتے تھے، لیکن آج لوگ بے حد پریشان ہیں۔ آر ٹی آئی کے ذریعہ انھوں نے انکشاف کیا کہ 2015 سے لے کر 2023 تک کیجریوال نے کوئی واٹر ٹریٹمنٹ پلانٹ نہیں لگایا۔

ڈاکٹر نریش نے کہا کہ کیجریوال یہ کہتے نہیں تھکتے کہ وہ پانی کے ٹینکر ختم کر دیں گے، لیکن آر ٹی آئی سے ملی جانکاری کے مطابق ٹینکر پہلے کے مقابلے دوگنے ہو گئے ہیں۔ اس کے علاوہ ناجائز کالونیوں میں نالیوں کا جال بچھانے کی بات بھی بالکل ہوا ہوائی ثابت ہوئی۔

واضح رہے کہ کیجریوال نے 2015 کے اسمبلی انتخاب میں دہلی کی عوام کو ہر گھر میں نل سے پانی دینے کا وعدہ کیا تھا۔ حالانکہ 2015 میں 567 ٹینکروں کے مقابلے میں 31 دسمبر 2021 میں ٹینکروں کی تعداد 891 یعنی تقریباً دوگنی ہو گئی۔ وہیں دوسری ریاستوں سے دہلی کو ملنے والے پانی کے مقدار میں کوئی اضافہ نہیں کیا گیا ہے۔ اس کے علاوہ 2015 میں واٹر بورڈ کا قرض 30838 کروڑ روپے تھا جو 31 مارچ 2021 میں بڑھ کر تقریباً دوگنا 57899 کروڑ روپے ہو گیا ہے۔ ظاہر ہے اس مدت میں کیجریوال حکومت کے ذریعہ صرف نیا قرض ہی لیا گیا ہے۔