رام مندر: آر ایس ایس نے سپریم کورٹ کو دی تحریک چلانے کی دھمکی

راشٹریہ سویم سیوک سَنگھ (آر ایس ایس) نے رام مندر تعمیر کو لے کر ایک بڑا بیان دیا ہے ۔ جنوری تک معاملہ کو ٹالنے کے لئے سَنگھ نے سپریم کورٹ کو دھمکی آمیز لہجے میں کہا ہے کہ وہ ہندو سماج کے جذبات کو سمجھے۔سَنگھ کی آل انڈیا ایگزیکٹیو ڈویژن کے تین روزہ اجلاس کے بعد بھیا جی جوشی نے کہا ’’عدالت کے فیصلہ میں تاخیر ہو رہی ہے اور عدالت نے غیر معینہ مدت کے لئے اس کو ٹال دیا ہے اور ایسا کرنا ان کے دائرۂ اختیار میں ہے ۔ لیکن جب عدالت سے پوچھا گیا کہ اس معاملہ کی سماعت کب ہوگی؟ تو عدالت نے کہا کہ ’’اس کی اور بھی ترجیحات ہیں ‘‘۔ بھیا جی نے کہا کہ ’’عدالت کے اس بیان سے ہندو سماج بے عزتی محسوس کر رہا ہے ۔ ہم عدالت سے گزارش کرتے ہیں کہ وہ اس پر غور کرے اور ہندو ؤں کے عقیدے اور جذبات کا خیال رکھے‘‘۔

آر ایس ایس نے کہا کہ اگر ضرورت پڑی تو رام مندر تعمیر کو لے کر تحریک چلائیں گے ۔ گزشتہ تیس سالوں سے تحریک چل رہی ہے اور مندر تعمیر میں بہت تاخیر ہو چکی ہے ۔ اگر کوئی راستہ نہیں بچتا ہے تو پھر قانون ہی آخری سہارا ہے۔

خاص بات یہ ہے کہ بھیا جی جوشی سپریم کورٹ کو اس لہجے میں بات کرنے والے حکومت کے رویہ پر جواب دیتے ہیں تو وہ حکومت اور بی جے پی کا بچاؤ کرتے ہیں۔ بھیا جی جوشی نے رام مندر تعمیر پر حکومت کے ذریعہ آرڈیننس لانے کے مطالبہ پر کہا کہ جن کو یہ مطالبہ کر نا ہے وہ کریں لیکن یہ فیصلہ حکومت کو کرنا ہے کہ اس کو اس پر کیا کرنا چاہئے ۔انہوں نے کہا کہ حکومت یا بی جے پی پر دباؤ بنانے کی بات نہیں ہے، یہاں آ پس میں اتفاق رائے ضروری ہے ۔

ممبئی میں ہوئے آر ایس ایس کے اجلاس میں بی جے پی صدر امت شاہ نے بھی شرکت کی ۔ واضح رہے کہ یہاں امت شاہ کی سَنگھ سربراہ موہن بھاگوت سے بھی ملاقات ہوئی۔جوشی نے بتایا کہ امت شاہ کی صبح ملاقات ہوئی تھی اور ملاقات کے دوران رام مندر سمیت کئی معاملات پر گفتگو ہوئی ۔ انہوں نے کہا کہ جب تک عدالت اپنا فیصلہ نہیں سناتی تب تک حکومت کے لئے بھی چیلنج رہے گا۔