مودی کابینہ کی حلف برداری سے یہ راستے متاثررہیں گے
نریندر مودی آج شام کو راشٹرپتی بھون میں وزیراعظم کے عہدے کا حلف لیں گے۔ پریشانی سے بچنے کے لیے پولس نے سبھی سے ٹریفک ایڈوائزری پر عمل کرنے کی اپیل کی ہے۔
![<div class="paragraphs"><p>فائل تصویر آئی اے این ایس</p></div>](https://media.assettype.com/qaumiawaz%2F2024-06%2F3de17af5-21bd-48c4-950d-13bcd6d0ede4%2FModi_offer_letter.jpg?rect=0%2C0%2C2636%2C1483&auto=format%2Ccompress&fmt=webp)
فائل تصویر آئی اے این ایس
لوک سبھا انتخابات 2024 کے نتائج کے پانچ دن بعد آج یعنی 9 مئی کو نریندر مودی شام دیر گئے تیسری بار ملک کے وزیر اعظم کے طور پر حلف لیں گے۔ وہ ملک کے پہلے وزیر اعظم پنڈت جواہر لال نہرو کے بعد مسلسل تیسری بار وزیر اعظم کے عہدے کا حلف لینے والے دوسرے سیاست داں ہوں گے۔ وزیر اعظم کے طور پر حلف لینے سے پہلے نریندر مودی نےبابائے قوم مہاتما گاندھی کو خراج عقیدت پیش کرنے کے لیے صبح راج گھاٹ اور وار میموریل کا بھی دورہ کیا۔ اس دوران مودی کابینہ کی حلف برداری کی تقریب کو مدنظر رکھتے ہوئے دہلی ٹریفک پولس نے ٹریفک ایڈوائزری جاری کی ہے تاکہ عوام کو کسی قسم کی پریشانی کا سامنا نہ کرنا پڑے۔
دہلی پولس نے ٹریفک ایڈوائزری میں کہا ہے کہ حلف برداری کی تقریب کے پیش نظر 9 جون کو دوپہر 2 بجے سے 11 بجے تک راشٹرپتی بھون کے آس پاس ٹریفک کے خصوصی انتظامات نافذ رہیں گے۔ پولیس نے دہلی کے لوگوں سے ایڈوائزری پر عمل کرنے کی اپیل کی ہے۔ بہتر ہو گا کہ گھر سے نکلنے سے پہلے ایڈوائزری پڑھ لیں۔
دہلی میں نئی حکومت کی حلف برداری کی تقریب کو مدنظر رکھتے ہوئے، اتوار کی سہ پہر سے رات 11 بجے تک فضائی حدود کو مکمل طور پر بند کردیا جائے گا۔ یہ پابندیاں شیڈول آپریٹرز کی طے شدہ پروازوں پر لاگو نہیں ہوں گی۔ پابندی کا ہندوستانی فضائیہ، بارڈر سیکورٹی فورس اور فوج کے ہیلی کاپٹر آپریشنز پر بھی کوئی اثر نہیں پڑے گا۔ اس دوران گورنر یا وزیر اعلیٰ کے ساتھ سرکاری طیارے اور ہیلی کاپٹر پرواز کر سکتے ہیں۔ غیر شیڈول پروازوں اور چارٹرڈ طیاروں کے ٹیک آف اور لینڈنگ کی اجازت نہیں ہوگی۔
سال 2014 اور 2019 کی طرح اس بار بھی مرکز میں حکومت بھارتیہ جنتا پارٹی (بی جے پی) کی نہیں بلکہ این ڈی اے اتحاد کی طرف سے بن رہی ہے۔ یہ پہلا موقع ہوگا جب وزیر اعظم نریندر مودی اس اتحاد کی مخلوط حکومت کی قیادت کریں گے جس میں بی جے پی کو اکثریت نہیں ملی ہے۔ حلف برداری سے قبل امت شاہ اور راج ناتھ سنگھ کے علاوہ پارٹی صدر جے پی نڈا نے بی جے پی اور اتحادیوں کے درمیان وزراء کونسل میں حصہ داری کو حتمی شکل دی ہے۔ مخلوط حکومت میں بی جے پی کے سینئر لیڈروں کی نمائندگی کے سلسلے میں ٹی ڈی پی سربراہ این چندرابابو نائیڈو، جے ڈی یو سربراہ اور بہار کے وزیر اعلیٰ نتیش کمار اور مہاراشٹر کے وزیر اعلیٰ اور شیو سینا شندے دھڑے کے سربراہ ایکناتھ شندے سمیت دیگر حلیفوں سے بھی بات چیت کی گئی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔