کانگریس کے بغیر کوئی تھرڈ فرنٹ نہیں بن سکتا: لالو

راشٹریہ جنتا دل (آر جے ڈی) کے سربراہ لالو پرساد یادو نے تیسرے محاذ کے قیام سے متعلق باتوں کو خارج کرتے ہوئے کہا ہے کہ کانگریس کے بغیر کسی فرنٹ کا تصور نہیں کیا جا سکتا۔ انھوں نے ایک نیوز چینل سے بات چیت کے دوران یہ باتیں کہیں۔ وہ کہتے ہیں کہ ’’اس وقت بی جے پی کے خلاف متحد اپوزیشن کی ضرورت ہے۔‘‘ لالو پرساد یادو نے مزید کہا کہ ’میں تیسرے محاذ کو کانگریس سے الگ نہیں مانتا۔ کانگریس جب اپوزیشن میں ہے تو وہی فرنٹ ہے۔‘‘ اتر پردیش میں ایس پی اور بی ایس پی اتحاد سے متعلق سوال کے جواب میں لالو پرساد نے خوشی ظاہر کی اور کہا کہ مایاوتی اور اکھلیش یادو کا ایک ساتھ آنا خوش آئند ہے۔

واضح رہے کہ چارہ گھوٹالہ معاملے میں سزا کاٹ رہے بہار کے سابق وزیر اعلیٰ لالو پرساد یادو علاج کے لیے دہلی کے ایمس پہنچ گئے ہیں۔ رِیمس کے ڈاکٹروں کی صلاح کے بعد انھیں راجدھانی ٹرین سے دہلی لایا گیا۔ دہلی پہنچنے کے بعد لالو پرساد نے بہار کے وزیر اعلیٰ نتیش کمار اور بی جے پی کی سخت تنقید کی۔ انھوں نے کہا کہ ’’بہار میں حکومت پر نتیش کمار اپنی گرفت کھو چکے ہیں۔ نتیش حکومت میں بی جے پی لیڈروں نے بہار کو آگ کے حوالے کر دیا ہے، ہر جگہ فسادات اور تشدد برپا ہیں لیکن کوئی سخت قدم نہیں اٹھایا جا رہا۔ وزیر اعلیٰ حکومت پر اپنی گرفت کھو چکے ہیں۔‘‘