ہندوستان کسی کے باپ کا نہیں جو سب کو پاکستان بھیج دیں گے: تیجسوی

انتخابات میں مخالفین پر حملے کرنا اور ان کےخلاف محاذ کھولنا ایک عام بات ہے لیکن اس سال کے عام انتخابات میں جو زبان اور جو ایشوز اٹھائے جا رہے ہیں اس سے انتخابی مہم کے معیار پر سوال کھڑے ہو گئے ہیں۔ وزیر اعظم سے لے کر زیادہ تر سیاسی رہنما انتخابات کے وقار کو تار تار کر رہے ہیں۔ بی جے پی کے بیگو سرائے کے امیدوار گری راج سنگھ ایسے سیاسی رہنماؤں کی فہرست میں سب سے آگے آتے ہیں اور وہ اقلیتوں کے تعلق سے مستقل الٹے سیدھے بیان دیتے رہے ہیں۔ اپنے بیانوں میں مخا لفین کو پاکستان بھیجنا تو ان کا تکیہ کلام بن گیا ہے۔

راشٹریہ جنتا دل (آر جے ڈی) کے رہنما تیجسوی یادو نے مرکزی وزیر گری راج سنگھ کے مخالفین کو پاکستان بھیجنے والے بیان پر آڑے ہاتھوں لیتے ہوئے کہا ہے کہ ہندوستان کسی کے باپ کا نہیں ہے۔ حال ہی میں ایک انتخابی جلسہ کو خطاب کرتے ہوئے تیجسوی نے کہا ’’ گری راج سنگھ کہتے ہیں کہ سب کو پاکستان بھیج دیں گے۔ ہندوستان کسی کے باپ کا ملک نہیں ہے جو وہ سب کو پاکستان بھیج دیں گے‘‘۔ ایسا نہیں ہے کہ تیجسوی یادو نے پہلی مرتبہ گری راج سنگھ پر حملہ بولا ہے اس سے قبل وہ ان کو ’گر گٹ راج‘ اور’ وش راج‘ کہہ چکے ہیں۔

ایک جلسہ سے خطاب کرتے ہوئے تیجسوی نے کہا تھا ’’اے گر گٹ راج زمینداری کے دن گئے پر تمہاری زمینداری نہیں گئی۔ تمہارے باپ کا زمین ہے یہ ؟دلت پسماندہ، قبائلی، اقلیتوں کو پاکستان جانے کے لئے کہتا ہے90 سے پہلے کے بندھوا سمجھے ہو کیا ؟ ارے ہم یہاں کہ اصلی شہری ہیں، تم جاؤ پاکستان‘‘۔

واضح رہے کہ گری راج سنگھ بی جے پی کے ٹکٹ پر بیگو سرائے سے چناؤ لڑ رہے ہیں اور ان کے خلاف جے این یو کے لیڈر کنہیا کمار سی پی آئی کے ٹکٹ پر چناوی میدان میں ہیں جبکہ آر جے ڈی کے امیدوار تنویر حسن ہیں۔