آر جے ڈی نے رابڑی دیوی اور عبدالباری صدیقی کو ایم ایل سی الیکشن میں اتارنے کا کیا اعلان

آئندہ 21 مارچ کو بہار میں قانون ساز کونسل (ایم ایل سی) کی 11 سیٹوں کے لیے انتخاب ہونے والا ہے۔ اس کے پیش نظر آر جے ڈی نے سابق وزیر اعلیٰ رابڑی دیوی اور سابق وزیر عبدالباری صدیقی کو میدان میں اتارنے کا اعلان کیا ہے۔ اس فہرست میں ڈاکٹر ارمیلا ٹھاکر، ششی یادو (سی پی آئی ایم ایل) اور شیوہر پارلیمانی حلقہ سے امیدوار رہے سید فیصل علی بھی شامل ہیں۔ سی پی آئی ایم ایل لبریشن نے گزشتہ ہفتہ بہار میں ریاستی قانون ساز کونسل کے انتخاب کے لیے پانی خاتون وِنگ کی لیڈر ششی یادو کو امیدوار بنایا تھا اور انھیں مہاگٹھ بندھن کی حمایت حاصل ہے۔ اسی لیے آر جے ڈی نے اپنی فہرست میں ششی یادو کا نام بھی شامل کیا ہے۔

ایم ایل سی الیکشن کے لیے نامزدگی کی آخری تاریخ 11 مارچ ہے۔ قانون ساز کونسل میں ایک سیٹ جیتنے کے لیے اسمبلی کے 21 اراکین کے ووٹوں کی ضرورت ہوتی ہے۔ ایسے میں تعداد پر نظر رکھی جائے تو این ڈی اے 6 سیٹوں پر کامیاب ہوتی دکھائی دے رہی ہے، جبکہ مہاگٹھ بندھن کے 5 امیدوار کامیاب ہوتے دکھائی دے رہے ہیں۔

قابل ذکر ہے کہ انتخابی کمیشن کے مطابق بہار کی 11 سیٹوں پر انتخاب کے لیے 4 مارچ کو نوٹیفکیشن جاری کیا گیا تھا۔ امیدواروں کو 11 مارچ تک پرچہ نامزدگی داخل کرنا ہے، جبکہ نامزدگی واپس لینے کی آخری تاریخ 14 مارچ ہے۔ 21 مارچ کو ووٹنگ کا عمل انجام دیا جائے گا اور ووٹوں کی گنتی 23 مارچ تک مکمل ہوگی۔