آگرہ میں جِم اور ریستوران کھولنے کی اجازت، تاج محل کے دیدار پر روک برقرار

آگرہ: آگرہ کی ضلع انتظامیہ نے منگل کے روز جِم اور ریستورانوں کو ایک مرتبہ پھر سے کھولنے کی اجازت فراہم کر دی، تاہم اس کے لئے کئی شرائط بھی عائد کی گئی ہیں۔ ضلع مجسٹریٹ پی این سنگھ نے کہا، ’’جم اور ریستوران رات 10 بجے تک ہی کھولے جا سکتے ہیں۔ انتظامیہ کی طرف سے جو رہنمایانہ ہدایات جاری کی گئی ہیں ان پر سختی سے عمل کرنا ضروری ہے۔ ان تمام مقامات پر ماسک، سینیٹائزر اور سوشل ڈسٹنسنگ کے احکامات پر عمل کرنا ہوگا۔‘‘

لیکن اگر آپ تاج محل اور آگرہ قلعہ کے دیدار کے متمنی ہیں تو آپ کی یہ خواہش ابھی پوری نہیں ہو سکتی، چونکہ انتظامیہ نے ان پر عائد روک برقرار رکھی ہے۔ وہیں انتظامیہ نے اشارہ دیا ہے کہ چھوٹی تاریخی عمارتوں کو سیاحوں کے لئے پھر سے کھولا جا سکتا ہے۔

دریں اثنا ایک سابق وزیر کی بیوی کی کورونا سے موت ہو جانے کے بعد یہاں ہلاکتوں کی تعداد 104 ہو گئی ہے۔ گزشتہ 24 گھنٹوں کے دوان 35 نئے کیسز درج کیے گئے ہیں۔ شہر میں 322 کیسز تاحال فعال ہیں اور اب تک 1922 افراد شفایاب ہو چکے ہیں۔

محکمہ صحت کے افسران کا کہنا ہے کہ یہاں کورونا کے مریضوں کی شفایابی کی شرح 81.90 فیصد ہے۔ یہاں کٹنمنٹ زون کی تعداد پھر سے بڑھ کر 167 ہو گئی ہے۔ ادھر قریبی ضلع متھرا میں تین اموات کے ساتھ مزید 54 کورونا کے کیسز درج کیے گئے۔ اس کے علاوہ فیروز آباد میں 15، ایٹہ میں 14 اور مین پوری میں 15 کیسز کی تصدیق کی گئی۔