ریلائنس کا سالانہ عام اجلاس آج، 5-جی کی شروعات جیسے کئی اہم اعلانات متوقع

نئی دہلی: ملک کی سب سے بڑی کمپنی ریلائنس انڈسٹریز کا 44 واں سالانہ جنرل اجلاس (اے جی ایم) آج یعنی جمعرات کو منعقد ہونے جا رہا ہے۔ اجلاس کے دوران ریلائنس جیو کے ذریعہ 5 جی خدمات کی شروعات جیسے کئی اہم اعلانات کی توقع کی جا رہی ہے۔

غورطلب ہے کہ جیو سمیت متعدد ٹیلی کام کمپنیوں کو ملک میں 5 جی خدمات کی آزمائش کے لئے محکمہ ٹیلی مواصلات کی اجازت مل گئی ہے۔ حال ہی میں جیو نے ممبئی میں 5 جی فیلڈ کا تجربہ کیا ہے۔ جلد ہی یہ ٹیسٹ دوسرے شہروں میں بھی کیا جائے گا۔ ریلائنس جیو کے سالانہ عام اجلاس میں اس کا اعلان ہو سکتا ہے۔ اے جی ایم آج دوپہر 2 بجے شروع ہوگی۔

ریلائنس کی اس ’اے جی ایم‘ پر اسٹاک مارکیٹ کے سرمایہ کاروں کی خصوصی نظر ہے۔ اس سالانہ عام اجلاس سے نہ صرف یہ معلوم ہوگا کہ ریلائنس نے گزشتہ مالی سال میں کس طرح کی کارکردگی کا مظاہرہ کیا ہے، بلکہ اس سے یہ بھی معلوم ہوگا کہ ریلائنس نے اگلے سالوں میں کیا منصوبے بنائے ہیں۔

اس کے علاوہ ریلائنس کے چیئرمین مکیش امبانی اپنے تیل کے کاروبار کی 20 فیصد شراکت داری سعودی عرب کی کمپنی ارمکو کو فروخت کرنے کا اعلان کر سکتے ہیں۔ پچھلے دس سالوں کی تاریخ پر نظر ڈالیں تو اے جی ایم کے بعد ریلائنس کے حصص مزید مستحکم ہو جاتے ہیں۔