رانی لکشمی بائی مجسمہ تنازعہ: دہلی ہائی کورٹ کی مداخلت کے بعد معاملہ ہوا حل، عید گاہ کمیٹی بھی راضی

دہلی کے موتیا خان علاقہ کے شاہی عید گاہ کے قریب رانی لکشمی بائی کا مجسمہ لگانے سے جڑے ایک معاملے کا دہلی ہائی کورٹ نے گزشتہ پیر کو نپٹارہ کر دیا۔ 7 اکتوبر کو اس معاملے میں ہائی کورٹ کو بتایا گیا کہ مسلم فرقہ کے مذہبی جذبات کو ذہن میں رکھتے ہوئے عید گاہ کی دیوار سے 200 میٹر کی دوری پر پارک کے کونے میں جھانسی کی رانی لکشمی بائی کا مجسمہ لگایا گیا ہے۔ رانی لکشمی بائی کے مجسمہ کے چاروں طرف دیوار بھی بنائی گئی ہے تاکہ نماز پڑھنے والوں کو کوئی دقت نہ ہو۔ اس کے جواب میں پیر کو ہائی کورٹ میں سماعت کے دوران عید گاہ انتظامیہ کمیٹی کے وکیل نے بھی کوئی اعتراض ظاہر نہیں کیا۔

اس معاملے میں دہلی ہائی کورٹ نے 5 اکتوبر کو متعلقہ سرکاری ایجنسیوں کی ایک کمیٹی کو کہا تھا کہ آپ عید گاہ انتظامیہ کے لوگوں کو پارک لے جا کر دکھائیں کہ رانی لکشمی بائی کا مجسمہ کہاں ہے؟

دو دن قبل ہائی کورٹ میں سماعت کے دوران دہلی میونسپل کارپوریشن نے بتایا تھا کہ جھانسی کی رانی لکشمی بائی کا مجسمہ نصب کیا جا چکا ہے۔ اسے تین طرف سے کور کیا جائے گا۔ یہ مجسمہ عید گاہ کی دیوار سے دو سو میٹر کے فاصلے پر نصب کیا گیا ہے۔ جبکہ عید گاہ کمیٹی کے وکیل نے کہا تھا کہ موتیا خان پارک میں رانی لکشمی بائی کا مجسمہ لگ چکا ہے۔

دراصل موتیا خان کے پاس رانی لکشمی بائی کا مجسمہ لگنے پر شاہی عید گاہ انتظامیہ کمیٹی نے دہلی ہائی کورٹ میں عرضی داخل کرتے ہوئے کہا تھا کہ شاہی عید گاہ کی زمین پر جاری تجاوزات پر روک لگائی جائے کیونکہ یہ ایک وقف املاک ہے۔ عرضی میں 1970 کے گزٹ کے نوٹیفکیشن کا ذکر کیا گیا تھا جس میں شاہی عید گاہ پارک کو قدیم املاک بتایا گیا تھا جو مغل دور میں بنا تھا۔ سنگل بنچ نے شاہی عید گاہ انتظامیہ کمیٹی کی عرضی خارج کرتے ہوئے کہا تھا کہ عید گاہ کی باؤنڈری کے چاروں طرف کا کھلا علاقہ اور عید گاہ پارک ڈی ڈی اے کی املاک ہے۔