رعنا ایوب کی مشکلات میں اضافہ، منی لانڈرنگ معاملہ میں ای ڈی نے دائر کی فرد جرم

نئی دہلی: انفورسمنٹ ڈائریکٹوریٹ (ای ڈی) نے صحافی رعنا ایوب کے خلاف انسداد منی لانڈرنگ ایکٹ کے تحت چارج شیٹ دائر کر دی ہے۔ رعنا ایوب پر الزام ہے کہ انہوں نے چندے کی 2.69 کروڑ روپے کی رقم کا اپنے لیے استعمال کیا اور فارن کنٹری بیوشن ایکٹ کی بھی خلاف ورزی کی۔

مرکزی ایجنسی نے 12 اکتوبر کو غازی آباد (اتر پردیش) میں منی لانڈرنگ کی روک تھام کے خصوصی قانون (پی ایم ایل اے) عدالت میں رعنا ایوب کے خلاف استغاثہ کی شکایت درج کی۔ جمعرات کو جاری کردہ ایک بیان میں ڈائریکٹوریٹ نے کہا، "رعنا ایوب نے فلاحی کاموں کے لیے فنڈز اکٹھا کرنے کے لیے اپریل 2020 سے 'کیٹو پلیٹ فارم' کے ذریعے تین چیریٹی مہمات شروع کیں اور مجموعی طور پر 26944680 روپے جمع کیے۔‘‘

بیان میں کہا گیا کہ رعنا ایوب اور ان کی ٹیم نے یہ مہمات کچی آبادیوں اور کسانوں کے لیے فنڈ اکٹھا کرنے، آسام، بہار اور مہاراشٹر میں امدادی کام کرنے اور ہندوستان میں کووڈ-19 سے متاثرہ افراد کی مدد کے لیے چلائی گئی تھیں۔ ای ڈی کا دعوی ہے کہ آن لائن پلیٹ فارم سے جمع کی گئی رقم رعنا ایوب کے والد اور بہن کے کھاتوں میں بھیجی گئی تھی اور اسے بعد میں ان کے ذاتی کھاتوں میں منتقل کر دیا گیا۔

ایجنسی نے کہا، "ایوب نے ان فنڈز میں سے 50 لاکھ روپے کی رقم اپنے فکسڈ ڈپازٹ (ایف ڈی) میں رکھی اور 50 لاکھ روپے ایک نئے بینک اکاؤنٹ میں منتقل کیے گئے۔ تحقیقات میں پتہ چلا ہے کہ امدادی کاموں میں صرف 29 لاکھ روپے استعمال کیے گئے تھے۔‘‘