راجیو گاندھی کی 30ویں برسی: راہل، پرینکا سمیت کانگریس کے لیڈران نے پیش کیا خراج تحسین

نئی دہلی: آج ملک کے سابق وزیر اعظم راجیو گاندھی کی برسی ہے۔ کانگریس پارٹی کی جانب سے اس دن کو خدمت اور خیرسگالی کے طور پر منانے کا اعلان کیا گیا ہے اور پارٹی لیڈران اور کارکنان سے اپیل کی گئی ہے کہ ان لوگوں کی مدد کی جائے جو کورونا کی وبا سے متاثر ہیں۔ اس موقع پر کانگریس کے سابق صدر راہل گاندھی اور پارٹی کی جنرل سکریٹری پرینکا گاندھی سمیت متعدد لیڈران نے آنجہانی راجیو گاندھی کو خراج عقیدت پیش کیا ہے۔

خیال رہے کہ سابق وزیر اعظم راجیو گاندھی کو 21 مئی 1991 کی شب تمل ناڈو کے سری پیرومبدور میں ایک انتخابی ریلی کے دوران ایک خاتون خود کش حملہ کی جانب سے قتل کر دیا گیا تھا۔ اس واقعہ میں خود کش حملہ آور دھنو سمیت 14 افراد کی جان چلی گئی تھی۔ ہندوستان میں یہ ممکنہ طور پر پہلا خود کش بم حملہ تھا جس میں کسی بڑے لیڈر کی جان چلی گئی۔

کانگریس لیڈر راہل گاندھی نے اپنے والد کو یاد کرتے ہوئے ٹوئٹر پر خراج عقیدت پیش کیا ہے۔ انہوں نے لکھا، ’’سچائی، شفقت، ترقی۔‘‘

پرینکا گاندھی نے بھی اپنے والد کو یاد کرتے ہوئے ٹوئٹر پر لکھا، ’’محبت سے بڑی کوئی قوت نہیں، رحم دلی بڑھ کر کوئی جرأت نہیں، شفقت سے بڑھ کر کوئی طاقت نہیں ہوتی اور عاجزی سے بڑھ کر کوئی استاد نہیں۔‘‘

کانگریس کے ترجمان رندیپ سنگھ سرجے والا نے اس موقع پر لکھا، ’’ راجیو گاندھی کی شہادت کا 30واں سال۔ عاجزانہ خراج تحسین۔‘‘

اس سے قبل کانگریس کے تنظیمی جنرل سکریٹری کے سی وینو گوپال نے کہا کہ ملک بحران سے دو چار ہے، جس کی وجہ سے بہت سے لوگ تکلیفوں اور پریشانیوں میں مبتلا ہیں۔ 21 مئی کو سابق وزیر اعظم رجیو گاندھی کی 30 ویں برسی ہے۔ آنجہانی راجیو گاندھی کو سب سے بڑا خراج عقیدت یہی ہوگا کہ کورنا کے دور میں لوگوں کی جان بچائی جائے۔‘‘

وینو گوپال نے کہا کہ راجیو گاندھی ’خدمات اور خیرسگالیُ کو بہت مانتے تھے، لہذا اسی حساب سے کام کئے جائیں گے۔ ضرورت مند غریب لوگوں کو، اسپتال میں مریضوں کے تیمارداروں کو، ایمبولنس ڈرائیوروں، شمشان گھاٹ اور قبرستان میں لوگوں میں کھانا تقسیم کریں گے۔ ریاستی اور ضلعی سطح پر ماسک کے تئیں بیداری لانے کے لئے مہم چلائی جائے گی اور ملک بھر میں عام لوگوں کو راحتی کٹ (جس میں راشن ہو) اور میڈیکل کٹ (جس میں ماسک، سینیٹائزر اور ادویات موجود ہوں) تقسیم کی جائیں گی۔