میں ’ڈبل واہیات‘ اور ’مہا غنڈہ‘ ہوں: بی جے پی ممبر اسمبلی

راجستھان کے شری مادھو پور سے بی جے پی ممبر اسمبلی جھابر سنگھ کھرّا کی بدزبانی کا ایک ویڈیو سوشل میڈیا پر وائرل ہو رہا ہے۔ اس ویڈیو میں وہ ایک پرائیویٹ کالج کے مالک کے ساتھ انتہائی بدتمیزی کے ساتھ پیش آ رہے ہیں۔ ویڈیو میں جھابر سنگھ کہتے ہوئے سنے جا رہے ہیں کہ ’’تم واہیات ہو تو میں ڈبل واہیات ہوں، کوئی غنڈہ گردی کرتا ہے تو میں مہا غنڈہ ہوں۔‘‘

موصولہ اطلاعات کے مطابق بی جے پی ممبر اسمبلی جھابر سنگھ پرائیویٹ کالج میں چل رہے کسی تنازعہ کا حل نکالنے کے لیے گئے تھے اور جب اس دوران کالج کے مالک نے ان سے کوئی سوال پوچھ لیا تو ان کا غصہ ساتویں آسمان پر پہنچ گیا۔ انھوں نے کالج کے مالک سے یہ بھی کہا کہ تمیز سے بات کرنے پر تم لوگ سر پر چڑھ جاتے ہو۔ ویڈیو کے منظر عام پر آنے کے بعد سوشل میڈیا پر لوگ جھابر کی تنقید بھی کر رہے ہیں اور ان کا مذاق بھی اڑا رہے ہیں۔