راجستھان: بلدیاتی انتخاب میں کانگریس کی زبردست کامیابی کے بعد وزیر اعلیٰ کا رد عمل آیا سامنے

جے پور: راجستھان کے وزیر اعلی اشوک گہلوت نے ریاست کے بلدیاتی انتخابات میں پچاس میں سے 36 اداروں میں کانگریس اور دو میں آزاد امیدواروں کے صدر منتخب ہونے پر کہا کہ یہ بہت خوش آئندہے کہ عوام کی حمایت کانگریس کے ساتھ ہے۔ انھوں نے آج ان بلدیاتی اداروں میں کانگریس کی زبردست فتح کے بعد اپنے رد عمل میں یہ بات کہی۔

اشوک گہلوت نے کہا کہ 50 میں سے 36 میں کانگریس پارٹی کا اور دو میں آزاد امیدواروں کا انتخاب ہونا بہت خوش آئندہے، ان اداروں میں صدر کے عہدے کے لئے منتخب ہونے والے تمام امیدواروں کو قلبی مبارکباد اور نیک خواہاشات۔ انہوں نے کہا کہ سب کے تعاون سے ہم ریاست میں گڈ گورننس اور ترقی کو فروغ دیتے رہیں گے۔

وزیر اعلی نے پارٹی کے تمام کارکنوں اور لیڈروں کو مبارکباد دیتے ہوئے ان کا شکریہ بھی ادا کیا ۔ انہوں نے کہا کہ وہ رائے دہندگان سے اظہار تشکر کرتے ہیں جنہوں نے کانگریس پارٹی کی پالیسیوں، عوامی فلاح و بہبود کے پروگراموں پر اعتماد کا اظہار کیا ہے۔ انہوں نے کہا کہ ان انتخابات میں بھارتیہ جنتا پارٹی (بی جے پی) کو 50 میں سے 12 سیٹوں تک سمیٹ دیا گیا ہے۔ عوام کی حمایت کانگریس کے ساتھ ہے۔