عاشورہ کے پیش نظر راجہ بھیّا کے والد اودے پرتاپ سنگھ ہوئے ہاؤس اریسٹ، 3 دن تک رہیں گے نظر بند

کنڈا کے رکن اسمبلی راجہ بھیّا کے والد ادئے پرتاپ  سنگھ کو ہاؤس اریسٹ کر لیا گیا ہے۔ محرم کے تہوار کے پر امن انعقاد کے لیے مقامی انتظامیہ نے تین دنوں کے لیے انہیں ان کی رہائش گاہ بھدری کوٹھی میں نظر بند کیا ہے۔ انہیں ہر سال محرم کے موقع پر ان کے مخالفانہ رویے کی وجہ سے ہاؤس اریسٹ کیا جاتا ہے۔ وہ کافی سالوں سے عاشورہ کے دن کنڈا کے پریاگ راج (الہ آباد) لکھنؤ ہائی وے کے شیش پور گاؤں میں سڑک جام  کرنے کی کوشش کرتے ہیں۔

راجہ بھیا کے والد ادئے پرتاپ سنگھ کے ذریعے ہائی وے جام کرنے کی وجہ سے پولیس و انتظامیہ کہ محرم کے پر امن انعقاد کے لیے کافی  مشقت کرنی پڑتی ہے۔ اس لیے پولیس نے امن و امان کے لیے احتیاطی اقدام کرتے ہوئے ادئے پرتاپ  سنگھ کو ان کے گھر میں یہ نظر بند کر دیا ہے۔ پیس کمیٹی کی میٹنگ میں پرتاپ گڑھ کے ڈی ایم اور ایس پی نے فرقہ وارانہ کشیدگی نہ بڑھانے کی اپیل کی ہے۔ ایس ڈی ایم اور سی او بڑی تعداد میں پولیس فورس کے ساتھ بھدری کوٹھی پہنچے اور وہاں ادئے پرتاپ سنگھ کو ہاؤس اریسٹ  کیا۔ اس بار ادئے پرتاپ کو تین دنوں کے لیے نظر بند رکھا جائے گا۔ بھدری کوٹھی کے گیٹ پر بڑی تعداد میں پولیس فورس تعینات ہے۔

واضح رہے کہ راجہ بھیّا ٹھاکروں کے لیڈر مانے جاتے ہیں۔ اپنی رعب کی بنا پر وہ مسلسل اسمبلی انتخابات جیتتے آ رہے ہیں۔ راجہ بھیّا نے اب اپنی پارٹی  بھی بنا لی ہے۔ مگر ادئے پرتاپ سنگھ نے کبھی راجہ بھیا کے لیے ووٹ نہیں مانگا اور نہ ہی وہ ان کے لیے انتخابی مہم چلانے گئے۔ کہا جاتا ہے کہ ادئے پرتاپ سنگھ کا کہنا ہے کہ انہیں کسی کے آگے ہاتھ جوڑنا پسند نہیں ہے، اس لیے وہ انتخابات سے دور رہتے ہیں۔