پہلی بارش میں ہی یوگی حکومت کی قلعی کھلی، اکھیلیش یادو

سماج وادی پارٹی کےسربراہ اکھلیش یادو نے کہا ہے کہ اترپردیش میں مانسون کی معمولی بوندیں پڑتے ہی ترقی کے دعووں کی قلعی کھل گئی ہے۔ ہر گھر نل کا نعرہ دے رہی بی جے پی کے اقتدار میں نل سے جل تو آیا نہیں بلکہ ہر گھر جل میں ضرور ڈوبا ہوا ہے۔

یادو نے ایک بیان میں کہا کہ وزیر اعلی یوگی آدتیہ ناتھ کا آبائی شہر گورکھپور بی جے پی کی بدعنوانی کا 'بھاجپا تال'(جل نگر) بن گیا ہے۔ رم جھم بارش میں راپتی کامپلکس اور بجلی کارپوریشن کے ایگزکٹیو انجینئر شہری دفتر میں پانی بھر گیا۔ بی جے پی حکومت ہر گھر نل کا نعرہ دے رہی ہے نل سے جل تو نہیں آیا لیکن ہر گھر جل میں ضرور ڈوب گیا ہے۔ ویسے اترپردیش میں بدعنوانی کا نالا لبالب ہے۔

انہوں نے کہا کہ وزیر اعظم نریندر مودی کے پارلیمانی حلقے وارانسی کے شہری علاقے میں پانی جمع ہونے سے لوگ پریشان ہیں۔ یہاں شہر کے ہر علاقے میں بارش میں گھنٹوں پانی بھرارہا۔ پنک کاریڈور کے طور پر فروغ دئیے گئے دشامیشور گھاٹ پر گھٹنوں تک پانی جمع ہوگیا۔ کئی علاقوں میں دوکانوں میں پانی بھر گیا۔ گدولیا سے دشاشیو میگھ شاہراہ تک پانی بھر گیا۔

راجدھانی لکھنؤ میں سیلاب پمپنگ اسٹیشنوں کی حالت ٹھیک نہیں ہے۔ کہیں پمپوں کی سمت ٹھیک نہیں ہے تو کہیں ڈیزل کی کمی ہے۔ نالوں کی صفائی میں بھی لاپرواہی ہورہی ہے۔ حیدر کینال سمیت شہر کے 88سے زیادہ نالوں پر غیر قانونی قبضے ہوچکے ہیں۔ ان نالوں کے کنارے تمام غیر قانونی بستیاں بس گئی ہیں۔ نالوں کی چوڑائی سمٹ گئی ہے۔ تیز بارش میں نالوں میں طغیانی ہے جس سے نچلے علاقوں میں تباہی مچ گئی ہے۔

سابق وزیر اعلی نے کہا کہ دعوے چاہئے جتنے کئے جائیں حقیقت میں نالوں کی صفائی کے کام میں صرف بدعنوانی ہی نظر آتی ہے۔ نالوں سے کیچڑ نکال کر کنارے ڈال دی جاتی ہے جو بارش ہوتے ہی نالوںمیں بہ جاتاہے۔ تمام کوڑے کچرے بھی ان میں ڈالے جاتے ہیں۔ معائنہ کے نام پر افسروں کی خانہ پری عوام پر بھاری پڑرہی ہے۔

انہوں نے کہا کہ بارش کے دوران بجلی گرنے سے حالات اور زیادہ خراب ہوگئے ہیں۔ بجلی گرنے سے ہورہی اموات کا سلسلہ برقرار ہے۔ سوال یہ ہے کہ جب پہلی بار بارش میں ہی عوام پانی جمع ہونے اور آسمانی بجلی گرنے کے بحران سے نبردآزما ہونے کو مجبور ہیں تو مانسون کی کئی دنوں تک ہونی والی بارش میں کیا ہوگا۔