ریلوے کا کرایہ، رسوئی گیس کے دام بڑھانا، نئے سال پر عوام کو کرارا جھٹکا: کانگریس

نئی دہلی: کانگریس نے کہا ہے کہ حکومت سے نئے سال پر لوگوں کے مسئلوں کو کم کرنے کے لئے پختہ قدم اٹھانے کی امید تھی لیکن اس نے ریلوے کا کرایہ اور رسوئی گیس سلینڈر کے دام بڑھاکر ان امیدوں پر پانی پھیرا ہے اور پارٹی اس کی مذمت کرتی ہے۔

خواتین کانگریس کی صدر اور پارٹی ترجمان سشمتا دیو نے بدھ کو یہاں کانگریس ہیڈکوارٹر میں نامہ نگاروں سے کہا کہ ریلوے کا کرایہ اور رسوئی گیس سلینڈر کے دام بڑھاکر حکومت نے عام لوگوں کے ساتھ ناانصافی کی ہے اور نئے سال پر عام لوگوں پر کیا گیا ظلم قابل مذمت ہے۔

انہوں نے کہا کہ نئے سال پر حکومت کو بے روزگاری سے متاثر لوگوں کا درد کم کرنے اور بدحال معیشت میں بہتری لانے کے لئے قدم اٹھانے چاہیے تھے لیکن اس نے سال کے پہلے دن ریلوے کا کرایہ اور ایل پی جی سلینڈر کے دام بڑھاکر عام آدمی کو گہرا دھکا دیا ہے۔ یہ دھکا عام لوگوں کے لئے ناقابل برداشت ہے۔

ایسا لگتا ہے کہ حکومت بے روزگاری اور بدحال ہوتی معیشت میں بہتری لانے کے اقدامات کرنے کے بجائے لوگوں کو مزید بحران میں ڈالنے کا کام کرنے میں زیادہ دلچسپی لے رہی ہے۔ ترجمان نے کہا کہ ملک کے 2.30 کروڑ لوگ ریلوے پر انحصار کرتے ہیں اور ان کا کرایہ بڑھاکر حکومت نے انہیں بے رحمی سے کچلنے کی کوشش کی ہے۔ حکومت نے کرائے میں اضافہ ایسے موقع پر کیا ہے جب دیہی صارفین کی شرح گر گئی ہے۔ سرکاری اعداد و شمار کے مطابق لوگوں کی خرید کی صلاحیت گر گئی ہے اور بے روزگاری 45 سال کی سب سے اونچی سطح پر پہنچ گئی ہے۔

سشمتا دیو نے کہا کہ نئے سال پر حکومت نے لوگوں کو جو جھٹکا دیا ہے اس کے مطابق ریزروڈ کیٹیگری کے ریل ڈبے میں سفر کرنے پر ایک مسافر کو دو ہزار کلومیٹر کے سفر کےلئے کرایہ 20 روپے بڑھاکر دینا ہوگا۔ اسی طرح سے غیر اے سی کٹیگری کے سلیپر ڈبے میں اتنی ہی دوری کا سفر طے کرنے کےلئے کرایہ 40 روپے بڑھ گیا ہے اور اگر کوئی شخص اے سی ڈبے میں دو ہزار کلومیٹر کاسفر کرتے ہیں تو اس کا کرایہ 80 روپے بڑھا کر دینا پڑےگا۔

انہوں نے کہا کہ اسی طرح سے سلینڈر کے دام بڑھاکر بھی حکومت نے لوگوں پر بھاری بوجھ ڈالا ہے۔انہوں نے کہا کہ سلینڈر گیس کےلئے دسمبر 2019 کے دام کے مقابلے اگر جنوری 2020 سے کیا جائے تودہلی میں رسوئی گیس کے سلینڈر کےلئے صارفین کو 695 روپے کے مقابلے میں اب 714 روپے دینے ہوں گے جبکہ کولکاتہ میں 725 کی جگہ اب 747روپے اور ممبئی میں 665 سے 684.50 روپے دینے ہوں گے۔

مرکزی وزیر پرکاش جاوڈیکر کے شہریت ترمیمی قانون کے خلاف ہوئے مظاہروں کے دوران دہلی میں ہوئے تشدد کےلئے کانگریس کو ذمہ دار ٹھہرانے سے متعلق سوال پر انہوں نے اس الزام کو غلط بتایا اور کہا کہ حکومت اپنے گھمنڈ میں عوام کے مسئلوں کو نظر انداز کررہی ہے اورکوئی اسے مسئلہ ماننے کو تیار ہی نہیں ہے۔