راہل نوین انفورسمنٹ ڈائریکٹوریٹ کے نئے ڈائریکٹر بنائے گئے، 2 سال کی ہوگی مدت کار

انفورسمنٹ ڈائریکٹوریٹ یعنی ای ڈی کے نئے ڈائریکٹر کا آج اعلان کر دیا گیا۔ جاری نوٹیفکیشن کے مطابق 1993 بیچ کے انڈین ریونیو سروس (آئی آر ایس) کے افسر راہل نوین کو ای ڈی کا نیا ڈائریکٹر بنایا گیا ہے۔ مرکزی کابینہ کی اپوائنٹمنٹس کمیٹی نے راہل نوین کی تقرری سے متعلق تصدیق کی ہے۔

قابل ذکر ہے کہ راہل نوین اس وقت انفورسمنٹ ڈائریکٹوریٹ میں خصوصی ڈائریکٹر کی شکل میں کام کر رہے ہیں۔ 14 اگست کو جاری نوٹیفکیشن میں انھیں فوری اثر سے ایجنسی کا ڈائریکٹر بنانے کی جانکاری دی گئی ہے۔ ان کی تقرری ان کے ذریعہ عہدہ و ذمہ داری سنبھالنے کی تاریخ سے اثر انداز ہوگی۔ یہ تقرری دو سال کی مدت کار، یا پھر آئندہ حکم جاری ہونے تک منظور کی گئی ہے۔

واضح رہے کہ راہل نوین آئی آر ایس (انکم ٹیکس) کے 1993 بیچ کے افسر ہیں۔ انھوں نے 15 ستمبر 2023 کو جانچ ایجنسی کے کارگزار ڈائریکٹر کا عہدہ سنبھالا تھا۔ انھوں نے پچھلے ڈائریکٹر سنجے کمار مشرا کی جگہ لی تھی۔ انچارج ڈائریکٹر کی شکل میں اپنی تقرری سے قبل نوین نے سنجے مشرا کے ساتھ مل کر کام کیا تھا۔