دہلی کوچنگ حادثے پر راہل گاندھی کا بیان، ’اپنی جان گنوا کر عدم احتساب کی قیمت چکا رہا عام شہری‘

نئی دہلی: دہلی کوچنگ حادثے پر غم کا اظہار کرتے ہوئے کانگریس کے رکن پارلیمنٹ راہل گاندھی نے کہا کہ یہ بنیادی ڈھانچے کی تباہی اور نظام کی مشترکہ ناکامی ہے۔ انہوں نے کہا کہ محفوظ اور پر سکون زندگی ہر شہری کا حق اور حکومتوں کی ذمہ داری ہے۔

راہل گاندھی نے سوشل میڈیا پلیٹ فارم ایکس پر لکھا، ’’دہلی میں ایک عمارت کے بیسمنٹ میں پانی بھر جانے سے مقابلہ کے امتحان کی تیاری کرنے والے طلباء کی موت انتہائی افسوسناک ہے۔ چند روز قبل بارش کے دوران بجلی کا جھٹکا لگنے سے ایک طالب علم کی موت ہو گئی تھی۔ میں تمام سوگوار خاندانوں سے دلی تعزیت کا اظہار کرتا ہوں۔‘‘

انہوں نے مزید لکھا، ’’انفراسٹرکچر کا یہ انہدام نظام کی مشترکہ ناکامی ہے۔ عام شہری غیر محفوظ تعمیرات، ناقص ٹاؤن پلاننگ اور ہر سطح پر اداروں کی عدم جوابدہی کی قیمت اپنی جانوں سے ہاتھ دھو رہے ہیں۔ محفوظ اور آرام دہ زندگی ہر شہری کا حق اور حکومتوں کی ذمہ داری ہے۔

خیال رہے کہ راجدھانی دہلی کے اولڈ راجندر نگر میں ایک کوچنگ سینٹر کے بیسمنٹ میں بارش کا پانی بھرنے سے 3 طالب علموں کی موت ہو گئی۔ دہلی پولیس نے اس حادثے میں جان گنوانے والے طلبہ کی شناخت کر لی ہے۔ دہلی پولیس کے مطابق حادثہ میں یوپی کے امبیڈکر نگر کی شریا یادو، تلنگانہ سے تعلق رکھنے تانیا سونی اور کیرالہ کے ایرناکلم کی نیوین ڈالون کی موت ہو گئی۔

کانگریس صدر ملکارجن کھڑگے نے بھی کوچنگ سینٹر حادثے پر غم کا اظہار کیا ہے۔ انہوں نے کہا کہ کانگریس نے دہلی کو بین الاقوامی سطح کا شہر بنایا ہے لیکن آج ہندوستان کی راجدھانی بے حسی کا شکار ہے۔ اس قسم کا حادثہ ہم سب کے لیے انتہائی تشویش کا باعث ہے۔