رکن پارلیمنٹ اور لوک سبھا میں قائد حزب اختلاف بننے کے بعد راہل گاندھی کا پہلی بار رائے بریلی کا دورہ

نئی دہلی: کانگریس لیڈر راہل گاندھی لوک سبھا میں اپوزیشن لیڈر بننے کے بعد 9 جولائی کو یعنی آج پہلی بار رائے بریلی کا دورہ کر رہے ہیں۔ وہ 18ویں لوک سبھا میں رائے بریلی سے رکن پارلیمنٹ منتخب ہوئے ہیں۔ رکن پارلیمنٹ منتخب ہونے کے بعد یہ ان کا رائے بریلی کا پہلا دورہ ہے۔ وہ رائے بریلی میں کانگریس پارٹی کے لیڈروں اور کارکنوں سے ملاقات کریں گے۔ وہ ضلعی انتظامیہ کے ساتھ میٹنگ بھی کر سکتے ہیں۔ اس دوران وہ اپنے علاقے میں جاری منصوبوں کے بارے میں معلومات حاصل کریں گے۔

راہل گاندھی نے اتر پردیش کے رائے بریلی اور کیرالہ کے وائناڈ سے لوک سبھا کا الیکشن لڑا تھا اور دونوں سیٹوں سے جیٹ حاصل کی تھی۔ قواعد کے مطابق انہیں دو میں سے ایک نشست چھوڑنی پڑی۔ راہل نے رائے بریلی سیٹ سے ایم پی رہنے کا فیصلہ کیا ہے اور وائناڈ سیٹ چھوڑ دی ہے۔

انڈیا اتحاد نے اتر پردیش میں لوک سبھا انتخابات میں شاندار کارکردگی کا مظاہرہ کیا ہے۔ جہاں، 2019 کے انتخابات میں کانگریس نے ریاست میں صرف ایک سیٹ جیتی تھی، وہیں، اس بار کانگریس نے 6 سیٹیں جیتی ہیں۔ کانگریس کی حلیف سماج وادی پارٹی نے 37 سیٹیں حاصل کی ہیں۔

راہل گاندھی نے اس جیت کے لیے اتر پردیش کے ووٹروں کا شکریہ ادا کیا۔ اس کے ساتھ ہی انہوں نے اتر پردیش میں اس جیت کے لیے پرینکا گاندھی کی بھی تعریف کی۔ راہل گاندھی نے کہا تھا کہ ہمیں یوپی میں زبردست جیت ملی ہے اور اس کے لیے میں اپنی بہن پرینکا کا بھی شکریہ ادا کرنا چاہتا ہوں، جنہوں نے یہاں بہت کام کیا۔

یاد رہے کہ راہل گاندھی اتر پردیش کی رائے بریلی سیٹ سے امیدوار تھے اور انہوں نے یہاں سے تین لاکھ 90 ہزار سے زائد ووٹوں سے کامیابی حاصل کی۔ اس بار کانگریس نے اتر پردیش کی امیٹھی سیٹ بھی جیت لی ہے۔ سال 2019 میں راہل گاندھی یہاں اس وقت کی مرکزی وزیر اسمرتی ایرانی سے لوک سبھا انتخابات ہار گئے تھے۔ اس بار کانگریس پارٹی کی کشوری لال شرما نے اسمرتی ایرانی کو بڑے فرق سے شکست دی ہے۔ نتائج کے بعد راہل گاندھی نے کہا تھا، ’’یوپی نے کمال کیا ہے۔ اتر پردیش کے لوگوں نے آئین کی حفاظت کی ہے۔ یوپی کے لوگوں نے انڈیا اتحاد کا ساتھ دیا اور اس کامیابی میں پرینکا کا بھی ہاتھ ہے۔’’