راہل گاندھی سے چوتھے دن 12 گھنٹے پوچھ گچھ، ای ڈی نے آج پھر کیا طلب

نئی دہلی: نیشنل ہیرالڈ معاملہ میں ای ڈی (انفورسمنٹ ڈائریکٹوریٹ) نے پیر کے روز راہل گاندھی کو چوتھی مرتبہ طلب کیا اور 12 گھنٹے تک پوچھ گچھ کی۔ راہل گاندھی اے پی جے عبد الکلام روڈ واقع ایجنسی کے صدر دفتر سے رات دیر گے تقریباً ساڑھے بارہ بجے باہر نکلے۔ راہل گاندھی صبح 11 بجے کے بعد ای ڈی کے دفتر پہنچے تھے اور دوپہر میں ایک گھنٹے سے زیادہ وقت کے لئے اپنی زیڈ پلس زمرے کی سی آر پی ایف حفاظت کے ساتھ باہر آئے تھے۔

دیر رات گئے ای ڈی کے دفتر سے نکالنے کے بعد راہل گاندھی بہن پرینکا گاندھی کے ساتھ کانگریس صدر سونیا گاندھی کی رہائش گاہ پر پہنچے۔ یہاں دونوں نے کافی دیر تک سونیا گاندھی سے ملاقات کی اور اس کی خیریت معلوم کی۔ اس کے بعد رات دیر گئے راہل گاندھی اور پرینکا گاندھی واپس لوٹ گئے۔

ای ڈی نے راہل گاندھی کو آج پانچویں مرتبہ بیان درج کرانے کے لئے طلب کیا ہے۔ کیرالہ کے وائناڈ سے رکن پارلیمنٹ اور کانگریس کے سابق صدر راہل گاندھیی نے 13 جون کو اپنی پہلی پیشی کے بعد سے چار نشستوں میں تفتیشی ایجنسی کے ساتھ 40 گھنٹے سے زیادہ وقت گزارا ہے۔

ایجنسی نے کانگریس صدر سونیا گاندھی کو بھی اس معاملہ میں 23 جون کو پوچھ گچھ کے لئے طلب کیا ہے۔ انہیں پیر کے روز دہلی کے ایک نجی اسپتال سے چھٹی دے دی گئی، جہاں انہیں کورونا کے بعد کی صحت سے متعلق پریشانیاں پیش آنے کے بعد داخل کرایا گیا تھا۔