گجرات انتخابات میں پارٹی کی مدد نہ کرنے والے کارکنان کے خلاف کارروائی ہوگی: راہل

گجرات اسمبلی انتخابات میں بی جے پی کو 99 سیٹ پر محدود کر دینے کے بعد کانگریس سربراہ راہل گاندھی نے آج ایک بار پھر گجرات کا دورہ کیا۔ اپنا گجرات دورہ صبح انھوں نے سومناتھ مندر میں پوجا کے ساتھ شروع کیا جس کے بعد انھوں نے ممبران اسمبلی اور کارکنان سے ملاقات کی۔ احمد آباد میں کانگریس کارکنان سے خطاب کرتے ہوئے انھوں نے جہاں کانگریس کی بہتر کارکردگی کے لیے خوشی کا اظہار کیا وہیں اُن پانچ سے دس فیصد پارٹی کارکنان کے خلاف سخت کارروائی کرنے کا اشارہ بھی دیا جنھوں نے اندرونی خلفشار کی وجہ سے نقصان پہنچایا۔

سنیچر کو پارٹی کارکنان سے بات چیت کے دوران انھوں نے کئی بار کانگریس کو مضبوط بنانے کے لیے ان کا شکریہ ادا کیا اور کئی بار سخت تیور اختیار کرتے ہوئے نظر آئے۔ راہل گاندھی نے کہا کہ ’’اگر کانگریس ایک ساتھ کھڑی ہو جاتی ہے تو وہ ہارتی نہیں ہے۔ 90 فیصد لوگ ایک ساتھ لڑے اور انتخاب میں کانگریس کو جتانے کی کوشش کی۔ 5 سے 10 فیصد لوگوں نے پارٹی کی مدد نہیں کی اور اب ان کے خلاف ایکشن لیا جائے گا۔‘‘ اس کے ساتھ ہی پرجوش انداز میں انھوں نے بھروسہ دلایا کہ گجرات میں پارٹی کی جو نئی قیادت تیار ہوئی ہے وہ 2022 میں اپنا ادھورا کام مکمل کرے گی۔ انھوں نے کارکنان کا حوصلہ بڑھاتے ہوئے کہا کہ ’’گجرات کے اگلے اسمبلی انتخاب میں کانگریس 135 سیٹیں جیتے گی، اس لیے آپ پیچھے نہیں ہٹیں۔ آپ بی جے پی سے لڑیں گے اور جیتیں گے۔‘‘

احمد آباد میں کارکنان سے مخاطب ہوتے ہوئے راہل گاندھی نے اسمبلی انتخابات میں پوری طاقت کے ساتھ لڑنے کی بات دہرائی اور ساتھ ہی انتخابات کے دوران ہوئی کچھ غلطیوں کا اعتراف بھی کیا۔ اس موقع پر انھوں بی جے پی کی پالیسیوں اور اس کے جھوٹ پر بھی حملہ کیا۔ انھوں نے کہا کہ بی جے پی نے جس طرح سے ’گجرات ماڈل‘ کا جھوٹ چاروں طرف پھیلا رکھا تھا، کانگریس نے اس متھک کو توڑ دیا ہے۔ علاوہ ازیں انھوں نے یہ بھی کہا کہ بی جے پی گجرات اسمبلی انتخابات میں غصے کے ساتھ جب کہ کانگریس محبت کے ساتھ اتری۔ راہل نے کہا کہ ’’انتخاب میں ہماری شکست ہوئی لیکن ہم جیتے کیونکہ وہ غصے سے لڑے اور ان کے پاس سبھی وسائل تھے اور ہمارے پاس سچ تھا۔ ہم محبت کے ساتھ لڑے۔‘‘

راہل گاندھی نے کانگریس کے خلاف منفی باتوں کی تشہیر کرنے کا الزام بھی عائد کیا۔ انھوں نے اسٹیج سے پرجوش انداز میں کہا کہ ’’آئیے اب میں آپ کو بتاتا ہوں کہ آخر ہم انتخاب کیوں ہار گئے۔ گزشتہ 20 سالوں سے بی جے پی اور نریندر مودی نے ریاست میں کانگریس پارٹی، اس کے لیڈروں اور کارکنان کے خلاف غلط بیانی کی ہے۔ تین سے چار مہینے قبل کچھ لوگ یہ سوال کھڑے کر رہے تھے کہ کیا کانگریس گجرات میں انتخاب لڑ پائے گی۔ لیکن ان سبھی باتوں کو کانگریس نے غلط ثابت کر دیا۔‘‘