یومِ افواج کے موقع پر راہل گاندھی نے بہادر فوج کو کیا سلام، کہا- بہادری، حب الوطنی اور قربانی سے سرشار ہے ہماری فوج

نئی دہلی: ہندوستانی فوج آج اپنا 75واں یوم تاسیس منا رہی ہے۔ آزادی کے بعد لیفٹیننٹ جنرل کے ایم کریپا کے ہندوستانی فوج کے پہلے اعلیٰ کمانڈر کے طور پر عہدہ سنبھالنے کی یاد میں ہر سال 15 جنوری کو ہندوستان کا یومِ افواج (آرمی ڈے) منایا جاتا ہے۔

کے ایم کریپا نے 15 جنوری 1949 کو برطانوی راج کے دوران ہندوستانی فوج کے آخری برطانوی اعلیٰ کمانڈر جنرل رائے فرانسس بچر سے عہدہ حاصل کیا تھا۔ آزادی کے بعد پہلی بار اس بار بنگلورو میں انڈین آرمی ڈے منایا جا رہا ہے۔

اس موقع پر راہل گاندھی نے بہادر فوجیوں کو سلام کیا۔ راہل گاندھی نے ٹوئٹ کیا کہ ہماری فوج کا ہر سپاہی بہادری، حب الوطنی اور قربانی سے سرشار ہے۔ تمام جوانوں، سابق فوجیوں اور ان کے اہل خانہ کو ان کی قربانی، تپسیا اور لگن کے لیے یوم افواج کی مبارک باد۔

یہ دن نئی دہلی اور تمام آرمی ہیڈکوارٹرز میں فوجی پریڈ، فوجی نمائش اور دیگر سرکاری تقریبات کے ساتھ منایا جاتا ہے۔ نیز اس دن ان تمام بہادر جنگجوؤں کو سلامی بھی دی جاتی ہے، جنہوں نے کسی نہ کسی وقت اپنے ملک اور عوام کی حفاظت کے لیے اپنی عظیم قربانیاں پیش کیں۔