کورونا کی وباء چیلنج بھی ہے اور موقع بھی، سائنس دانوں کو متحرک کیا جائے: راہل گاندھی

ہندوستان میں کورونا وائرس کے معاملات میں اضافہ کا سلسلہ جاری ہے۔ پورے ملک میں اس وائرس سے متاثرہ مریضوں کی تعداد 14 ہزار کو عبور کر چکی ہے۔ تاہم، اس کی زد میں آنے والے ہزاروں افراد صحتیاب بھی ہوئے ہیں۔ دریں اثنا، کانگریس کے رہنما راہل گاندھی نے کورونا وائرس کو چیلنج کے ساتھ ایک موقع بھی قرار دیا ہے۔

راہل گاندھی نے ٹوئٹ کرتے ہوئے کہا ’’کوویڈ ۔19 جیسی عالمی وباء ایک عظیم چیلنج ہے لیکن یہ ایک موقع بھی ہے۔ اس بحران کے دوران ہمیں سائنسدانوں، انجنیئروں اور ڈیٹا ماہرین کی وسیع تعداد کو متحرک کر کے جدید تحقیق پر مامور کرنے کی ضرورت ہے۔‘‘

غورطلب ہے ہے کہ کانگریس رہنما راہل گاندھی کورونا بحران کے درمیان مسلسل ٹوئیٹ کر رہے ہیں اور حکومت کو نیک مشورے دے رہے ہیں۔ اپنے ایک ٹوئٹ میں راہل گاندھی نے کہا تھا کہ ’’حکومت سے اپیل ہے کہ اس بحران کے وقت ’ہنگامی راشن کارڈ‘ جاری کیے جائیں۔ یہ کارڈ ان سبھی پر ہونے چاہیے جو اس لاک ڈاؤن کے دوران اناج کی کمی سے دو چار ہیں۔ ملک کے لاکھوں شہری راشن کارڈ کے بغیر عوامی نظام ترسیل (پی ڈی ایس) کا فائدہ حاصل کرنے سے قاصر ہیں۔ اناج گوداموں میں خراب ہو رہا جبکہ سینکڑوں بھوکے پیٹ انتظار کر رہے ہیں۔ جو کہ غیر انسانی عمل ہے!‘‘

دریں اثنا، راہل گاندھی نے کانگریس کی حکمرانی والی ریاستوں کی تعریف کرتے ہوئے ٹوئٹ کیا۔ انہوں نے کہا، ’’کانگریس کی حکمرانی والی ریاستیں راجستھان، پنجاب، چھتیس گڑھ اور پڈوچیری کوویڈ-19 کا ڈٹ کر مقابلہ کر رہی ہیں۔ خصوصی اسپتال تعمیر ہو رہے ہیں، مثلاً چھتیس گڑھ میں محض 20 دن میں علاج کے لئے 200 بستروں پر مشتمل خصوصی کورونا اسپیشل اسپتال تعمیر کیا گیا ہے۔ جہاں چاہ، وہاں راہ۔‘‘