راہل گاندھی نے منی پور میں تشدد متاثرین سے کی ملاقات، آج شام گورنر انوسوئیا اوئیکے کے ساتھ ہوگی میٹنگ

کانگریس رکن پارلیمنٹ اور لوک سبھا میں حزب اختلاف کے لیڈر راہل گاندھی نے آج منی پور میں تشدد متاثرین سے ملاقات کر ان کی خیریت دریافت کی اور موجودہ حالات و مسائل پر بات چیت کی۔ راہل گاندھی آج امپھال ایئرپورٹ پہنچے تو ان کا کانگریس لیڈران و کارکنان نے زوردار استقبال کیا۔ یہاں سے انھوں نے راحتی کیمپوں کا رخ کیا۔

قابل ذکر ہے کہ آج شام تقریباً 5.30 بجے راہل گاندھی منی پور کی گورنر انوسوئیا اوئیکے سے بھی ملاقات کرنے والے ہیں۔ اس کے بعد شام تقریباً 6.15 بجے وہ منی پور کانگریس دفتر میں ایک پریس کانفرنس سے خطاب کریں گے۔

اس سے قبل راہل گاندھی نے امپھال واقع جریبام ہائر سیکنڈری اسکول راحتی کیمپ کا دورہ کیا اور وہاں تشدد متاثرین کو امداد فراہم کی۔ بعد ازاں انھوں نے چراچندپور ضلع کے توئبونگ واقع راحتی کیمپ کا دورہ کیا۔ وہاں تشدد متاثرین کے ساتھ انھوں نے کچھ دیر گزارا اور ان کے ساتھ پیش آئے واقعات پر کھل کر بات چیت کی۔ کانگریس کے ’ایکس‘ ہینڈل پر کچھ ویڈیوز شیئر کی گئی ہیں جس میں دیکھا جا سکتا ہے کہ وہ تشدد متاثرین سے بات کر رہے ہیں۔

آج صبح راہل گاندھی نے آسام میں موجود اس راحتی کیمپ کا بھی دورہ کیا تھا جہاں منی پور تشدد متاثرین پناہ لیے ہوئے ہیں۔ چونکہ آسام میں لاکھوں لوگ سیلاب سے متاثر ہیں، تو انھوں نے سیلاب متاثرین سے بھی ملاقات کی اور ان کی پریشانیوں کو سمجھنے کی کوشش کی۔ راہل گاندھی نے پیر کے روز لکھی پور کے پھلیر تال واقع راحتی کیمپ کا بھی دورہ کیا جہاں سیلاب متاثرین پناہ لیے ہوئے ہیں۔