’ایک نیرو مودی ہے، دوسرا مودی نیرو ہے!‘، راہل کا مودی پر طنز

دہلی: پنجاب نیشنل بینک مہاگھوٹالہ سے متعلق منگل کو بھی پارلیمنٹ میں زبردست ہنگامہ دیکھنے کو ملا۔ پارلیمنٹ احاطہ میں کانگریس سربراہ راہل گاندھی کی قیادت میں کانگریس لیڈروں نے مظاہرہ کیا اور نعرے بھی لگائے۔ انھوں نے ’ملک کا چوکیدار کہاں گیا، سو گیا-سو گیا‘ جیسےنعرے لگائے جس کے بعد لوک سبھا کی کارروائی پہلے دوپہر 12 بجے تک اور پھر دن بھر کے لیے معطل کر دی گئی۔

کانگریس سربراہ نے ایک ٹوئٹ کرتے ہوئے کہا کہ ’’پارلیمنٹ میں آج ایک زوردار نعرہ سنائی پڑ رہا ہے: نیرو مودی، مودی نیرو، ایک نیرو مودی ہے، دوسرا مودی نیرو ہے!‘‘ راہل گاندھی نے اس بہانے وزیر اعظم نریندر مودی کو آواز سے عاری قرار دیا ہے۔ اس طرح انھوں نے ہر اہم ایشو پر وزیر اعظم کی خاموشی کو نشانہ بنایا ہے۔

پارلیمنٹ کے بجٹ سیشن کا دوسرا دور شروع ہونے کے بعد سے ہی اپوزیشن نے پی این بی گھوٹالہ، نیرو مودی، رافیل معاہدہ اور ایس ایس سی امتحانات میں دھاندلی جیسے ایشوز پر حکومت کو گھیر رکھا ہے۔ کانگریس نے حکومت سے بینکوں کی حالت پر پارلیمنٹ میں وہائٹ پیپر لانے کا مطالبہ کیا ہے۔ حالانکہ وزیر اعظم نریندر مودی اور وزیر مالیات ارون جیٹلی نے بینک گھوٹالے میں قصورواروں کے خلاف سخت کارروائی کی بات کہی ہے، لیکن کانگریس نے الزام عائد کیا ہے کہ حکومت معاملے کی ’لیپا پوتی‘ میں لگی ہوئی ہے اور وزیر اعظم سے اس ایشو پر پارلیمنٹ میں بیان دینے کا مطالبہ کیا ہے۔