جھوٹ بولنا آسان لیکن شہروں کی تعمیر مشکل، راہل کا مودی پر حملہ

کانگریس صدر راہل گاندھی نے کرناٹک کے شہری علاقوں کو نظر انداز کرنے کو لے کر مودی حکومت پر حملہ بولا۔ کانگریس صدر نے ’اسمارٹ سٹی ‘ منصوبے پر سوال کھڑے کئے ہیں۔ انہوں نے ٹوئٹ میں لکھا ’’پیارے وزیر اعظم ، بنگلورو کو ہندوستان کے فخر اور گارڈن سٹی کےطور پر جانا جاتا ہے لیکن لیکن آپ نے اسے گاربیج سٹی (گندگی کا شہر) کہا جو کہ توہین آمیز ہے۔ ‘‘

راہل گاندھی نے مزید لکھا ’’جھوٹ کے محل آپ آسانی سے کھڑے کر لیتے ہو لیکن شہروں کی تعمیر کرنا آپ کو مشکل نظر آتا ہے۔ ‘‘ کانگریس صدر نے اپنے ٹوئٹ کے ساتھ کرناٹک کے شہری علاقوں کی ترقی پر مبنی ڈیٹا بھی پیش کیا۔ انہوں نے کہا ’’مودی حکومت کے مقابلے یو پی اے حکومت نے اپنی مدت کے دوران 1100 فیصد زیادہ فنڈ کرناٹک کے شہروں کو فراہم کیا تھا۔ شہری علاقوں کی ترقی کے لئے یو پی اے نے 6570 کروڑ کا فنڈ دیا تھا جبکہ مودی حکومت نے محض 598 کروڑ روپے ہی دیئے ہیں۔‘‘