کانگریس کے قومی صدر ملکارجن کھڑگے کی آج یومِ پیدائش، راہل گاندھی و پی ایم مودی نے دی مبارکباد

کانگریس کے قومی صدر ملکارجن کھڑگے کی آج (21 جولائی) کو یومِ پیدائش ہے۔ اس مناسبت سے لوک سبھا میں اپوزیشن لیڈر راہل گاندھی نے انہیں مبارکباد پیش کرتے ہوئے ان کے لیے بہتر صحت کی خواہش کا اظہار کیا ہے۔ اسی کے ساتھ پی ایم مودی نے بھی کھڑگے کو ان کی یومِ پیدائش پر مبارکباد پیش کی ہے۔

کانگریس صدر ملکارجن کھڑگے کو ان کی سالگرہ پر مبارکباد دیتے ہوئے اپوزیشن لیڈر راہل گاندھی نے شوسل میڈیا پر ایک پوسٹ کیا ہے۔ انہوں نے لکھا ہے کہ ’ہیپی برتھ ڈے کھڑگے جی! عوام کی فلاح و بہبود کے لیے آپ کی انتھک خدمات اور لگن ایک تحریک ہے۔ آپ کے لیے ڈھیروں پیار۔ میں آپ کی اچھی صحت کی خواہش کرتا ہوں۔‘

کانگریس کے قومی صدر کو ان کی یومِ پیدائش پر پی ایم نریندر مودی نے بھی مبارکباد پیش کی ہے۔ پی ایم مودی نے نے سوشل میڈیا پلٹ فارم پر لکھا ہے کہ ’کانگریس صدر اور راجیہ سبھا میں اپوزیشن لیڈر ملکارجن کھڑگے کو سالگرہ کی مبارک باد۔ میں آپ کی طویل اور صحت مند زندگی کی خواہش کرتا ہوں۔‘

واضح رہے کہ کانگریس کے قومی صدر ملکارجن کھڑگے آج کے دن 1942 میں پیدا ہوئے تھے۔ وہ کئی دہائیوں سے سیاست میں سرگرم ہیں۔ وہ پارٹی میں اور اپنی آبائی ریاست و مرکز کی حکومتوں میں کئی اہم عہدوں پر فائز رہے ہیں۔ وہ 2021 سے راجیہ سبھا میں اپوزیشن لیڈر ہیں۔ اس کے علاوہ وہ 2020 سے کرناٹک سے راجیہ سبھا کے رکن ہیں۔ وہ کرناٹک کے بیدر ضلع کے بھالکی تعلقہ کے وراوٹی میں ایک دلت گھرانے میں پیدا ہوئے۔