وزیر اعظم مودی کی ماں کی طبیعت بگڑنے پر راہل و پرینکا گاندھی نے شیئر کیا جذباتی پیغام

وزیر اعظم نریندر مودی کی والدہ ہیرا بین کی طبیعت اچانک بگڑ گئی ہے اور وہ اس وقت اسپتال میں زیر علاج ہیں۔ انھیں دیکھنے کے لیے وزیر اعظم مودی احمد آباد کے یو این مہتا اسپتال میں پہنچ بھی چکے ہیں۔ اسپتال کا کہنا ہے کہ فی الحال ہیرا بین کی طبیعت مستحکم ہے اور ڈاکٹرس ان کی نگرانی کر رہے ہیں۔ اس درمیان کانگریس کے سرکردہ لیڈر راہل گاندھی اور پرینکا گاندھی نے ہیرا بین کی اچانک طبیعت خراب ہونے پر بذریعہ سوشل میڈیا جذباتی پیغام شیئر کیا ہے۔

کانگریس کے سابق صدر راہل گاندھی نے اپنے ٹوئٹ میں وزیر اعظم کی والدہ کے جلد صحت یاب ہونے کی تمنا ظاہر کی ہے۔ انھوں نے اپنے ٹوئٹ میں لکھا ہے کہ ’’ایک ماں اور بیٹے کے درمیان محبت بے پناہ اور لازوال ہوتی ہے۔‘‘ پھر وہ لکھتے ہیں ’’مودی جی، اس مشکل وقت میں میری محبت اور حمایت آپ کے ساتھ ہے۔ میں امید کرتا ہوں کہ آپ کی ماں جلد از جلد صحت یاب ہو جائیں۔‘‘

کانگریس جنرل سکریٹری پرینکا گاندھی نے بھی پی ایم مودی کی ماں کی طبیعت ٹھیک ہونے کی دعا کرتے ہوئے اپنے آفیشیل ٹوئٹر ہینڈل سے پیغام جاری کیا ہے۔ انھوں نے اس میں لکھا ہے ’’وزیر اعظم نریندر مودی جی کی والدہ کے بیمار ہونے کی خبر ملی۔ اس (مشکل) وقت میں ہم سب ان کے ساتھ ہیں۔ میں ایشور سے دعا کرتی ہوں کہ انھیں جلد صحت یابی ملے۔‘‘

چھتیس گڑھ کے وزیر اعلیٰ بھوپیش بگھیل نے بھی پی ایم مودی کی والدہ کے بیمار ہونے کی خبر ملنے کے بعد بذریعہ ٹوئٹ اظہارِ ہمدردی کی ہے۔ انھوں نے لکھا ہے ’’وزیر اعظم جی کی والدہ کے بیمار ہونے کی خبر موصول ہوئی ہے۔ ہم سب ان کے جلد صحت یاب ہونے کی دعا کرتے ہیں۔‘‘

واضح رہے کہ پی ایم مودی کی والدہ ہیرا بین کی عمر 100 سال ہے اور نیوز ایجنسی پی ٹی آئی کے مطابق انھیں سانس لینے میں تکلیف محسوس ہو رہی تھی جس کو دیکھتے ہوئے اسپتال میں داخل کرایا گیا۔ اسپتال کے طرف سے میڈیکل بلیٹن بھی جاری کیا گیا ہے جس میں بتایا گیا ہے کہ ہیرا بین کو کارڈیولوجی اینڈ ریسرچ سنٹر احمد آباد میں داخل کرایا گیا ہے اور ان کی حالت مستحکم ہے۔