دوسروں کی خوشی کی خاطر اپنے آرام و سکون کو بالائے طاق رکھنے والے لائق تحسین: ریڈ کریسینٹ سوسائٹی

ممبئی : کورونا وائرس کے باعث پھیلی اس وباء کے دوران دوسروں کی خوشی کی خاطر اپنے آرام اور سکون کو بالائے طاق رکھ کر انسانیت کی خدمت انجام دینے والے دو لاکھ سے زائد کارکنان کو خراج تحسین پیش کرتے ہوئے ریڈ کریسینٹ سوسائٹی آف آنڈیا کے چئیرمین ارشد صدیقی نے ان کا شکریہ ادا کرتے ہوئے کہا کہ "ہمیں اس وائرس سے ڈرنا نہیں لڑنا ہے اور جب ہم تمام تر احتیاطی تدابیر کے ساتھ میدان عمل میں ہوں گے جبھی ہم اس وائرس کو شکست دے سکیں گے"۔

ریڈ کریسینٹ سوسائٹی آف آنڈیا کی جانب سے جاری ایک بیان میں چئیرمین ارشد صدیقی نے کہا کہ کورونا وائرس کی اس وباء کے دوران کریسنٹ سوسائٹی آف انڈیا کے ملک بھر میں موجود دو لاکھ سے زائد کارکنان نے جس طرح سے انسانیت کی خدمت کی ہے وہ لائق تحسین ہے ہم ان کے شکر گزار ہیں کہ انہوں نے دوسروں کی خوشی کی خاطر اپنے سکون کو برباد کیا اور انسانیت کی خدمت میں لگے رہے-

بیان میں کہا گیا ہے کہ اس بحران کا دورانیہ طویل بھی ہوسکتا ہے اس لیے ہمیں پوری قوت کے ساتھ اس کا مقابلہ کرنا ہے ہمیں اس وائرس سے ڈرنا نہیں لڑنا ہے اور جب ہم تمام تر احتیاطی تدابیر کے ساتھ میدان عمل میں ہوں گے جبھی ہم اس وائرس کو شکست دے سکیں گے-

اپنے بیان میں ارشد صدیقی نے اس عالمی وباء کے دوران ریڈ کریسینٹ سوسائٹی آف آنڈیا کی جانب سے چلائی جا رہی مختلف اسکیموں اور کاموں میں تعاون دینے اور عملی طور پر خدمات انجام دینے والے تمام کارکنان، عہدیداران، طلبہ و طالبات اور عوام الناس کا شکریہ ادا کیا۔