پنجاب کی کانگریس حکومت نے مزید ایک انتخابی وعدہ پورا کیا، 15 لاکھ کنبہ کو ملا مفت بیمہ کور

پنجاب کی کانگریس حکومت کے وزیر اعلیٰ امرندر سنگھ نے اپنی حکومت کے ہیلتھ سے جڑے انتخابی وعدے کو پورا کرتے ہوئے جمعہ کو ان 15 لاکھ کنبوں کے لیے مفت بیمہ کور کا اعلان کیا جو پہلے آیوشمان بھارت-سربت صحت بیمہ منصوبہ کے دائرے میں شامل نہیں تھے۔ انھوں نے آج ورچوئل کابینہ میٹنگ میں اس فیصلہ کا اعلان کیا۔

حالانکہ محکمہ صحت نے ان کنبوں کو شیئر کی بنیاد پر سرکاری منصوبوں کے کور میں لانے کی تجویز پیش کی تھی، جس کے لیے مستفیدین کو خرچ کے کچھ حصے کی ادائیگی کرنی ہوتی۔ لیکن امرندر سنگھ نے پنجاب کے لوگوں کے لیے یونیورسل ہیلتھ سروس کے اپنی حکومت کے وعدے کے مطابق ان کنبوں کے لیے بیمہ کور بھی پوری طرح سے مفت کرنے کا مشورہ دیا۔

پنجاب حکومت کے ایک ترجمان نے میٹنگ کے بعد کہا کہ سرکاری ملازمین یا پنشن یافتگان کے کنبوں کو چھوڑ کر، جو پہلے سے ہی پنجاب میڈیکل اٹینڈینس قوانین کے تحت آتے تھے، ریاست کے تقریباً 55 لاکھ کنبے اب اس منصوبہ کے دائرے میں آئیں گے، جن سے ان کنبوں کو بڑی راحت ہوگی۔ حکومت نے بتایا کہ ریاستی حکومت اب 55 لاکھ کنبوں کو کور کرنے کے لیے ہر سال 593 کروڑ روپے کا خرچ برداشت کرے گی، جو پبلک اور پرائیویٹ اسپتالوں میں ثانوی اور تیسری دیکھ بھال علاج کے لیے فی کنبہ 5 لاکھ روپے کا بیمہ کور فراہم کرے گا۔