پنجاب: عآپ حکومت میں کان کنی مافیا کی دہشت، کسان رہنما کو ٹریکٹر سے کچل کر کیا ہلاک

چنڈی گڑھ: پنجاب میں عام آدمی پارٹی (عآپ) کی حکومت میں بے خوف کان کنی مافیا کی دہشت بدستور جاری ہے۔ موہالی میں کان کنی مافیا نے بھارتیہ کسان یونین ایکتا اوگراہاں سے وابستہ 70 سالہ کسان رہنما گروچرن سنگھ کو ٹریکٹر ٹرالی سے کچل کر ہلاک کر دیا۔ مقتول گروچرن سنگھ بڈانہ کے رہائشی تھے۔

کسان لیڈر گروچرن سنگھ کے بیٹے بھوپیندر سنگھ نے اس سلسلے میں پولیس میں کیس درج کرایا ہے۔ ہنڈیسرا تھانے کے انسپکٹر شیودیپ سنگھ برار نے واقعہ کی جانکاری دی ہے۔ بھوپیندر سنگھ نے اپنی شکایت میں بتایا کہ بڈانہ گاؤں کی شاملات زمین سے کان کنی کی جا رہی تھی۔ ان کے والد نے رات تقریباً 11.30 بجے کان کنی کی مشینوں کی آواز سنی اور اس کے بعد وہ موقع پر پہنچے۔ مہندر سنگھ ولد سورمکھ سنگھ بڈانہ بھی ان کے ساتھ موجود تھا۔

پولیس کو دی گئی شکایت کے مطابق کسان لیڈر گروچرن سنگھ موقع پر پہنچے اور کان کنی کرنے والے ٹریکٹر ٹرالی ڈرائیور کو روکا اور پوچھا کہ وہ مٹی کہاں لے جا رہے ہیں۔ ٹریکٹر کے ڈرائیور نے بتایا کہ ہرویندر سنگھ گگو ولد کرپال سنگھ اس مٹی کو نکلوا رہے ہیں۔ ٹریکٹر ٹرالی کے ڈرائیور نے پانچ سات نوجوانوں کو موقع پر بلایا۔ نوجوانوں نے کسان لیڈر سے کہا کہ ٹریکٹر ٹرالی کو جانے دو، ہم ہرویندر سنگھ کو بلا لیں گے۔ بحث کے دوران چار اور نوجوان موقع پر پہنچ گئے۔ ان میں سے ایک جسوندر سنگھ عرف کالا نے کسان لیڈر گروچرن سنگھ کو ٹریکٹر ٹرالی سے روند دیا۔ اس کے بعد وہ موقع سے فرار ہو گیا۔

شدید زخمی کسان لیڈر گروچرن سنگھ کو فوری طور پر سرکاری اسپتال ڈیرا بسی لے جایا گیا، جہاں ڈاکٹروں نے انہیں مردہ قرار دے دیا۔ پولیس نے ملزمان کی شناخت جسوندر سنگھ عرف کالا، جسوندر سنگھ عرف چھندا، ہرویندر سنگھ عرف گگو اور تین دیگر نامعلوم افراد کے طور پر کی ہے۔ تمام ملزمان کے خلاف مقدمہ درج کر لیا گیا ہے۔ ان میں سے ایک ملزم جسوندر سنگھ عرف کالا ولد چھجو سنگھ کو گرفتار کر لیا گیا ہے۔ جبکہ پانچ ملزمان تاحال مفرور ہیں۔

پولیس نے بتایا کہ جائے وقوعہ سے ایک موٹر سائیکل اور ٹریکٹر ٹرالی کو قبضے میں لے لیا گیا ہے۔ مفرور ملزمان کی تلاش جاری ہے۔مقامی لوگوں کے مطابق علاقے میں مٹی کی غیر قانونی کھدائی کا کاروبار کھلے عام جاری ہے اور ریاستی حکومت اسے روکنے میں ناکام رہی ہے۔ پنجاب میں عام آدمی پارٹی کی حکومت نے بڑے بڑے وعدے اور دعوے کیے تھے لیکن حقیقت سب کے سامنے ہے۔