پنجاب: اسسٹنٹ پولیس کمشنر کے بعد ایس ایچ او بیوی میں بھی کورونا کی تصدیق

لدھیانہ: پنجاب میں لدھیانہ کے اسسٹنٹ پولیس کمشنر انل کوہلی کی رپورٹ کورونا پازیٹیو آنے کے بعد ان کی بیوی اور ایس ایچ او تھانہ جودھیوال ارش پریت کور اور ایک کانسٹبل کی بھی کی رپورٹ پازیٹیو آئی ہے۔

موصولہ اطلاعات کے مطابق حال ہی میں کوہلی کا علاج اپولو اسپتال میں چل رہا تھا، اس درمیان انھیں سانس لینے اور گلے میں خراش کی شکایت ہوئی‘ ان کا ٹیسٹ کروایا گیا تو ان کی رپورٹ پازیٹیو آئی تھی۔ ان کے اسٹاف اور ان کی بیوی کو آئیسولیشن میں بھیج دیا گیا تھا۔

ان کی تفتیش شروع کر دی گئی تھی اوراطلاعات کے مطابق ان کی رپورٹ پازیٹیو آنے کے بعد ان کا علاج شروع کر دیا گیا ہے۔ اے سی پی کا ڈروائیور کانسٹیبل اپنے گاؤں فیروزپور چلا گیا تھا، ان کی بیوی اور ایس ایچ او کو قرنطینہ کرکے علاج چل رہا ہے۔

ابھی تک یہ بات معلوم نہ ہو سکی کہ کوہلی اس وائرس سے کہاں متاثر ہوئے جس کی زد میں ان کے اسٹاف کے ساتھ ان کی بیوی بھی آ گئیں۔ واضح رہے کہ ضلع ڈپٹی کمشنر پردیپ اگروال نے بتایا کہ اب تک ضلع میں کورونا مشتبہ 895 نمونے لیے گئے جن میں سے 722 کی رپورٹ نیگیٹیو آئی ہے اور 188 کی رپورٹ کا ہنوز انتظار ہے۔ ہاٹسپاٹ علاقوں کے آس پاس اسکریننگ کی جا رہی ہے۔

انہوں نے کہا کہ دہلی کے ایک ریسٹورنٹ کے فوڈ سپلائی کرنے والے اہلکار کی رپورٹ کورونا پازیٹیو آنے کے بعد انہوں نے لدھیانہ کے سارے ہوم ڈلیوری کرنے والے ریسٹورنٹ پر مکمل پابندی عائد کر دی گئی ہے۔ اب کسی طرح کی ہوم ڈلیوری نہیں ہوگی۔ ریپڈ سیمپل کِٹس جلد آ جائیں گی جن کی مدد سے کورونا ٹیسٹ آسان ہوجائے گا۔