نوح تشدد: کھٹر حکومت پوری طرح ناکام رہی : پنجاب اسمبلی اسپیکر

پنجاب اسمبلی کے اسپیکر کلتار سنگھ سندھواں نے ہریانہ کے نوح میں تشدد کے واقعات کو افسوسناک قرار دیتے ہوئے کہا ہے کہ اس سے لوگوں کے دلوں کو گہری ٹھیس پہنچi ہے۔

ان واقعات کی مذمت کرتے ہوئے سندھواں نے کہا ہے کہ مذہب کے نام پر قتل، لوٹ مار اور آتش زنی کے واقعات کسی بھی مہذب معاشرے کو زیب نہیں دیتے۔ انہوں نے کہا کہ وقت کا تقاضا ہے کہ تمام جمہوری جماعتیں اکٹھی ہوں اور معاشرے میں نفرت اور تشدد پھیلانے والی قوتوں کے خلاف عوامی بیداری پیدا کریں۔ انہوں نے ان واقعات کی سختی سے مخالفت کی ہے اور کہا ہے کہ مہذب معاشرے میں ایسے گھناؤنے واقعات کی کوئی جگہ نہیں ہونی چاہیے۔

ہریانہ کی موجودہ بی جے پی-جے جے پی حکومت پر طنز کرتے ہوئے انہوں نے کہا کہ وزیر اعلیٰ منوہر لال کھٹر ریاست کے وزیر اعلیٰ ہونے کے ناطے اپنی ذمہ داری کو نبھانے میں پوری طرح ناکام رہے ہیں، یہ ان کا اخلاقی فرض ہے کہ وہ ہر کسی کی جان و مال کی حفاظت کریں۔ انہوں نے کہا کہ اس واقعہ کے پیچھے کی وجوہات جاننے کے لئے گہرائی سے تحقیقات ہونی چاہئے اور اس کے پیچھے جو لوگ ہیں انہیں مناسب سزا ملنی چاہئے۔ انہوں نے کہا کہ ضلع نوح کے بعد یہ فرقہ وارانہ آگ گروگرام تک پہنچ گئی ہے جسے کسی بھی قیمت پر روکا جانا چاہئے۔