پنجاب: ایک کروڑ روپے کی رشوت معاملے میں ایڈیشنل آئی جی آشیش کپور کو وجلنس بیورو نے کیا گرفتار

پنجاب وجلنس بیورو نے ایک بڑی کارروائی کرتے ہوئے رشوت خوری معاملے میں ایڈیشنل آئی جی آشیش کپور کو گرفتار کر لیا ہے۔ رشوت خوری معاملے میں آشیش کپور کے خلاف کیس درج ہے اور اس تعلق سے ڈی ایس پی پون کمار اور اے ایس آئی ہرجندر سنگھ پر بھی ایف آئی آر درج ہے۔ دراصل آشیش کپور نے 2018 میں جعلسازی اور دھوکہ دہی کے کیس میں دو خواتین کو راحت دینے کے بدلے ان سے ایک کروڑ روپیہ کے چیک سائن کروا کر بینک سے نکلوا لیا تھا۔

واضح رہے کہ ایڈیشنل آئی جی آشیش کپور سینچائی گھوٹالہ کی جانچ میں افسر تھے۔ ان پر الزام ہے کہ انھوں نے محکمہ زراعت کے افسران سے پیسے لے کر ان کے نام بے گناہ لوگوں کی فہرست میں ڈال دیئے تھے۔ اس معاملے کی شکایت وجلنس کے پاس پہنچی تھی۔ اس کے بعد سے محکمہ اس معاملے کو سنجیدگی سے لے رہا تھا۔ اس کے ساتھ ہی آشیش کی ساری ملکیت سے لے کر بینک اکاؤنٹس کی جانچ کی گئی تھی۔

بتایا جاتا ہے کہ وجلنس کی ٹیم نے تقریباً پانچ گھنٹے تک موہالی میں آشیش کے نئے بنگلے کی پیمائش کی تھی۔ اس کے ساتھ ہی بنگلہ بنانے پر آئے خرچ کا حساب ٹیم نے ان سے مانگا تھا۔ اس کے بعد سے ہی وجلنس کی ٹیم کئی نکات پر جانچ کر رہی تھی۔ اس نے ان کے بیان قلمبند کیے تھے۔ اب جانچ پوری ہونے کے بعد آشیش کپور کی گرفتاری عمل میں آئی ہے۔

قابل ذکر ہے کہ آشیش کپور کے خلاف ایک خاتون نے بھی شکایت دی تھی۔ اس معاملے کی بھی جانچ کی جا رہی ہے۔ حالانکہ آشیش کپور کا شمار پنجاب پولیس کے تیز طرار افسران میں کیا جاتا رہا ہے۔ وہ چنڈی گڑھ میں بھی اپنی خدمات دے چکے ہیں۔ اتنا ہی نہیں، وہ ٹینس کے بہترین کھلاڑی بھی ہیں۔ پولیس ورلڈ گیم میں پنجاب کے لیے وہ کئی ایوارڈ جیت چکے ہیں۔