پیٹھ میں چھرا گھوپنے والے نتیش کو عوام مزہ چكھائے گی: لالو

پٹنہ: چارہ گھوٹالہ معاملہ میں سزا یافتہ اور راشٹریہ جنتا دل (آر جے ڈی) کے صدر لالو پرساد یادو نے اپنے ٹوئٹر ہینڈل پر کہا ہے کہ پیٹھ میں چھرا گھوپنے والے جنتا دل متحد (جے ڈی یو) کے صدر اور بہار کے وزیر اعلی نتیش کمار کو اس بار کے انتخابات میں عوام مزہ چکھائے گئی۔

لالو پرساد یادو نے ٹوئٹ کر کے کہا ’’نتیش بھول گئے کہ بابو جگ جیون رام نے کہا تھا کہ لوگ پیٹ کی مار تو برداشت کر سکتے ہیں لیکن پیٹھ کی مار کا جواب دیتے ہیں۔‘‘

انہوں نے مزید لکھا، ’’تم نے عوام کی پیٹھ میں جو وار کیا اس کا عوام مزہ چكھائے گی‘‘۔ قابل ذکر ہے کہ چارہ گھوٹالہ معاملہ میں لالو یادو جھارکھنڈ کی رانچی جیل میں بند ہیں۔

وہ نتیش کمار پر سال 2017 میں ان مہاگٹھ بندھن سے ناطہ توڑ کر قومی جمہوری اتحاد (این ڈی اے) کا دامن تھامنے پر مسلسل حملہ آور رہتے ہیں۔ لالو پرساد یادو کے علاوہ ان کی بیوی، بہار کی سابق وزیر اعلیٰ رابڑی دیوی اور ان کے بیٹے، بہار کے سابق نائب وزیر اعلیٰ تیجسوی یادو بھی ٹوئٹر کے ذریعہ مخالفین پر لگاتار نشانہ لگا رہے ہیں۔

ریزرویشن ختم کر دے گی بی جے پی: میسا بھارتی

ادھر لالو پرساد یادو کی بیٹی میسا بھارتی نے آر ایس ایس کے حوالہ سے این ڈی اے پر حملہ بولا ہے۔ میسا بھارتی نے کہا کہ ان کے والد لالو پرساد یادو نے گزشتہ انتخابات کے دوران سبھی سے کہا تھا کہ این ڈی اے ریزرویشن کا خاتمہ کر دے گا، اسی لئے حکومت نے آر ایس ایس کے اشارے پر قانون منظور کرایا ہے۔ اگر ان کی حکومت بنتی ہے تو وہ ریزرویشن کے لئے خطرہ ہوگی۔

میسا بھارتی نے کہا کہ آر ایس ایس اور این ڈی اے کے لوگ ہر طرح کے ریزرویشن کو ختم کرنے کے لئے کام کر رہے ہیں اور آگے وہ اس کام کو کرنے کے لئے پُرعزم ہیں۔

واضح رہے کہ میسا بھارتی پاٹلی پتر سیٹ پر مرکزی وزیر رام کرپال یادو کے خلاف الیکشن لڑ رہی ہیں۔ گزشتہ انتخابات میں بھی میسا بھارتی اور رام کرپال یادو کے درمیان مقابلہ ہوا تھا لیکن میسا بھارتی اس الیکشن میں ہار گئی تھیں۔

(یو این آئی ان پٹ کے ساتھ)