کسانوں کے حق میں پرینکا گاندھی نے پھر بلند کی آواز، یوگی حکومت پر حملہ

کسانوں کے ایشو کو لے کر کانگریس جنرل سکریٹری پرینکا گاندھی نے ایک بار پھر بی جے پی حکومت کو تنقید کا نشانہ بنایا ہے۔ انھوں نے کہا کہ بی جے پی حکومت میں کھاد نہ ملنے سے کسان بے حال ہیں۔ کانگریس کا عزم ہے کہ بوائی سیزن کے 30 دن پہلے کھاد موافق مقدار میں دستیاب کرا کر وقت پر کوآپریٹو کمیٹیوں اور پی سی ایف مراکز میں بھیجیں گے۔ ہماری ترجیح کسان کو وقت پر کھاد دینا ہے۔

پرینکا گاندھی نے اس تعلق سے ایک ٹوئٹ کیا ہے جس میں مذکورہ بالا عزائم کا اظہار کیا ہے۔ ساتھ ہی پرینکا گاندھی نے ایک خبر بھی شیئر کی ہے جس میں لکھا ہے کہ کھاد نہ ملنے سے کسان پریشان ہیں۔ کھاد نہ ملنے کی وجہ سے کسان در در بھٹک رہے ہیں۔

اس سے قبل 24 نومبر کو پرینکا گاندھی نے ٹوئٹ کر کے کہا تھا کہ جیور کے کسانوں کو معاوضہ کیوں نہیں دیا گیا ہے؟ کیوں کسان فیملی اس سردی میں ٹینٹ میں رہنے کو مجبور ہیں؟ معاوضہ کسانوں کا حق ہے۔ مودی جی کسانوں کے تئیں اگر آپ کی نیت سچ مچ صاف ہے تو اپنے انتخابی ارمانوں کو پورا کرنے کے لیے انھیں بے گھر مت چھوڑیے۔