یو پی میں ’کسان مہاپنچایت‘ سے پرینکا گاندھی کا خطاب، کہا ’کانگریس حکومت آنے پر سبھی قانون واپس ہوں گے‘

اتر پردیش کے سہارنپور میں آج کانگریس جنرل سکریٹری پرینکا گاندھی نے ہزاروں لوگوں کی بھیڑ سے خطاب کرتے ہوئے مرکز کی مودی حکومت کو کسان مخالف، مزدور مخالف اور عوام مخالف قرار دیا۔ سہارنپور میں ’کسان مہاپنچایت‘ کے دوران عوامی سیلاب کی موجودگی میں انھوں نے کسانوں کے حق کی آواز بلند کرتے ہوئے کہا کہ ’’56 انچ کے سینے کے اندر ایک چھوٹا سا دل ہے جو صرف کچھ صنعت کاروں کے لیے دھڑکتا ہے۔ جاگ جائیے، جن سے آپ امید رکھ رہے ہیں یہ آپ کے لیے کچھ نہیں کریں گے۔ اب آپ سمجھ جائیے، جو آپ سے یہ بڑے بڑے وعدے کرتے ہیں، ان کے الفاظ کھوکھلے ہیں۔‘‘ پرینکا گاندھی نے مزید کہا کہ ’’16 ہزار کروڑ کے 2 ہوائی جہاز لے لیے اور 20 ہزار کروڑ پارلیمنٹ کی سجاوٹ میں ختم کر دیا، لیکن کسانوں کا بقایہ 15 ہزار کروڑ آج تک نہیں دیا۔‘‘

متنازعہ زرعی قوانین کے تعلق سے کسانوں کی جاری تحریک کا تذکرہ کرتے ہوئے پرینکا گاندھی نے کہا کہ ’’یہ آپ کی زمین کی تحریک ہے، آپ پیچھے مت ہٹیے۔ ہم کھڑے ہیں، جب تک یہ بل واپس نہیں ہوتے تب تک ڈٹے رہیے۔‘‘ انھوں نے آگے کہا کہ ’’جب کانگریس کی حکومت آئے گی یہ سبھی بل واپس ہوں گے اور آپ کو ایم ایس پی کی پوری قیمت ملے گی۔‘‘ مرکز کی مودی حکومت پر حملہ آور ہوتے ہوئے پرینکا گاندھی نے کہا کہ ’’جب سینکڑوں لوگ انہی سڑکوں پر انہی شاہراہوں پر ننگے پیر اپنے گاؤں کی جانب جا رہے تھے تب کہاں تھی یہ حکومت؟ کیا سہولت دی؟ کس طرح سے مدد کی آپ کی؟ جن لوگوں کے لیے یہ کام کرتے ہیں وہ لوگ آپ کی پروا نہیں کرتے۔‘‘

پرینکا گاندھی نے کانگریس حکومت بننے پر کسانوں کے لیے آسانی فراہم کرنے کا وعدہ کیا۔ انھوں نے کہا کہ ’’جب کانگریس کی حکومت بنے گی تو قانون آپ کی مدد کے لیے بنیں گے، نہ کہ آپ کو پیسنے کے لیے۔ ہم آپ کے دلوں کے ساتھ اور زندگی کے ساتھ سیاست نہیں کریں گے۔ ہم آپ کو مذہب اور ذات کے نام پر توڑیں گے نہیں، آپ کا بنٹوارا نہیں کریں گے، ہم آپ کو جوڑیں گے۔‘‘

واضح رہے کہ کانگریس جنرل سکریٹری پرینکا گاندھی نے آج صبح ایک ٹوئٹ کیا تھا جس میں جانکاری دی تھی کہ وہ کسانوں کے دل کی بات سننے، سمجھنے اور ان سے اپنے جذبات کا اظہار کرنے کے لیے سہارنپور پہنچیں گی۔ اقلیتی سیل کے چیئرمین ندیم جاوید نے بھی ایک ٹوئٹ کیا تھا جس میں انھوں نے لکھا تھا کہ ’’سہارنپور میں کسان پنچایت میں پرینکا گاندھی جی کو سننے کے لیے ہزاروں ساتھی بڑی تعداد میں موجود ہیں۔ ’جے کسان‘ کے نعرے کو سچ کرنے آج کانگریس ہے کسانوں کے سنگ، تاکہ چلتی رہے یہ جدوجہد ہر پتھ پر، ہر لمحہ، ہر دم۔‘‘ اس ٹوئٹ کے ساتھ ندیم جاوید نے کچھ تصویریں بھی شیئر کیں جن میں لوگوں کی زبردست بھیڑ دکھائی دے رہی ہے۔