پرینکا گاندھی یعنی ایک مضبوط آواز پارلیمنٹ میں گونجے گی : آدتیہ ٹھاکرے
کانگریس صدر ملکارجن کھڑگے نے کہا کہ راہل گاندھی وایناڈ سیٹ چھوڑیں گے اور پرینکا گاندھی وہاں سے الیکشن لڑیں گی۔ شیو سینا (یو بی ٹی) لیڈر آدتیہ ٹھاکرے نے اس پر ردعمل ظاہر کیا ہے۔
![<div class="paragraphs"><p>فائل تصویر آئی اے این ایس</p></div>](https://media.assettype.com/qaumiawaz%2F2024-06%2F81f38d6f-0cbb-4742-9bb3-75d7b610af9f%2FAditya_pic.jpg?rect=0%2C1%2C3368%2C1895&auto=format%2Ccompress&fmt=webp)
فائل تصویر آئی اے این ایس
کانگریس رہنما راہل گاندھی نے اس بار لوک سبھا انتخابات میں دو سیٹوں سے کامیابی حاصل کی ہے۔ ان میں سے ایک وایناڈ اور دوسری رائے بریلی لوک سبھا سیٹ ہے۔ لیکن، اب پارٹی کی طرف سے یہ فیصلہ کیا گیا ہے کہ راہل گاندھی رائے بریلی سیٹ سے رکن پارلیمنٹ رہیں گے جبکہ وہ وائناڈ سیٹ چھوڑ دیں گے۔ راہل گاندھی کی بہن اور کانگریس لیڈر پرینکا گاندھی اس سیٹ سے الیکشن لڑیں گی۔ اس حوالے سے کانگریس اور انڈیا نامی اتحاد میں شامل دیگر جماعتوں کے رہنماؤں کی جانب سے ردعمل سامنے آرہا ہے۔
یہ بھی پڑھیں : مسلمانوں اور یادووں کا کوئی کام نہیں کروں گا: دیویش چندر
مہاراشٹر شیو سینا (یو بی ٹی) کے لیڈر آدتیہ ٹھاکرے نے بھی اس سلسلے میں ردعمل ظاہر کیا ہے۔ ایکس پر پوسٹ کرتے ہوئے، آدتیہ ٹھاکرے نے لکھا، "یہ سن کر خوشی ہوئی کہ پرینکا گاندھی لوک سبھا کا الیکشن لڑیں گی۔ ایک بہت مضبوط اور سرشار آواز جو پارلیمنٹ میں ہندوستان کی آواز کو مضبوط بنائے گی۔"
واضح رہےکہ پیر کو ایک پریس کانفرنس سے خطاب کرتے ہوئے کانگریس کے قومی صدر ملکارجن کھڑگے نے کہا تھا کہ راہل گاندھی کیرالہ کی وائناڈ لوک سبھا سیٹ چھوڑیں گے اور پارلیمنٹ کے ایوان زیریں میں اتر پردیش کی رائے بریلی کی نمائندگی کریں گے۔ کانگریس کی جنرل سکریٹری پرینکا گاندھی راہل گاندھی کی جانب سے خالی وائناڈ لوک سبھا سیٹ سے الیکشن لڑیں گی۔
ملکارجن کھڑگے نے کہا کہ راہل گاندھی نے 2 لوک سبھا سیٹوں سے کامیابی حاصل کی ہے، لیکن قانون کے مطابق انہیں ایک سیٹ چھوڑنی ہوگی۔ راہل گاندھی رائے بریلی کی سیٹ اپنے پاس رکھیں گے اور کانگریس نے فیصلہ کیا ہے کہ پرینکا گاندھی وایناڈ سے الیکشن لڑیں گی۔ الیکشن لڑنے کے فیصلے کے بعد پرینکا گاندھی نے وایناڈ کے لوگوں کو یقین دلایا کہ وہ راہل کی کمی محسوس نہیں کریں گے۔ انہوں نے کہا کہ وہ وایناڈ کو راہل کی غیر موجودگی کا احساس نہیں ہونے دیں گی اور وہ سخت محنت کریں گی اوروایناڈ میں سب کو خوش کرنے کی پوری کوشش کریں گی ۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔