ارنب واٹس ایپ چیٹ: پرینکا نے حکومت پر لگایا جوانوں کی زندگی سے کھیلنے کا الزام

بارک یعنی براڈ کاسٹ آڈینس ریسرچ کونسل کے سابق سی ای او پارتھو داس گپتا کے ساتھ ریپبلک ٹی وی کے ایڈیٹر ان چیف ارنب گوسوامی کی واٹس ایپ چیٹ افشا ہونے کے بعد سے لگاتار کانگریس اس ایشو کو لے کر مودی حکومت کو تنقید کا نشانہ بنا رہی ہے۔ اب کانگریس جنرل سکریٹری پرینکا گاندھی نے بی جے پی اور مودی حکومت پر حملہ کیا ہے۔ پرینکا گاندھی نے کہا ہے کہ حب الوطنی کا دعویٰ کرنے والے ملک مخالف کارنامے کرتے پکڑے گئے ہیں۔

پرینکا گاندھی نے اس سلسلے میں ایک ٹوئٹ کیا ہے جس میں انھوں نے لکھا ہے کہ ’’ملک کی حفاظت سے متعلق انتہائی رازداری والی باتیں ایک صحافی کو بتائی گئیں۔ ہمارے ملک کے بہادر جوان شہید ہوئے۔ صحافی کہتا ہے کہ ہمیں فائدہ ہوگا۔ نیشنلزم کا دعویٰ کرنے والے ملک مخالف کارنامے کرتے ہوئے پکڑے گئے۔ یہ بہت سنگین معاملہ ہے۔ اس کی غیرجانبدارانہ جانچ ہونی چاہیے۔‘‘ اس کے ساتھ ہی پرینکا گاندھی نے کسانوں کے ایشو کو لے کر بھی مرکزی حکومت کو نشانہ بنایا ہے۔ پرینکا گاندھی نے لکھا ہے کہ ’’ایک طرف یہ حکومت کسانوں کی سن نہیں رہی، دوسری طرف جوانوں کی زندگی سے کھیل رہی ہے۔ ’جے جوان، جے کسان‘ ہمارے ملک کا نعرہ ہے۔ صرف اسے بار بار دہرانے سے کام نہیں چلے گا، اس پر قائم رہنا ملک کے شہیدوں کے تئیں ہر لیڈر کا اخلاقی فرض ہے۔‘‘

واضح رہے کہ ارنب گوسوامی کی جن چیٹس کو ممبئی کرائم برانچ نے چارج شیٹ میں شامل کیا ہے، ان میں دو سال قبل ہندوستان کے بالاکوٹ میں کی گئی فوجی کارروائی سے بھی جڑی ہوئی باتیں شامل ہیں۔ اس سے ظاہر ہوتا ہے کہ ارنب گوسوامی کو یہ جانکاری پہلے سے تھی۔ دراصل 14 فروری 2019 کو پلوامہ کے قریب ایک سی آر پی ایف قافلہ پر دہشت گردانہ حملہ ہوا تھا۔ اس میں 40 جوان شہید ہو گئے تھے۔ اس دن پارتھو داس گپتا کے ساتھ اپنی مبینہ بات چیت میں گوسوامی پہلے کہتے ہیں کہ ان کا چینل کشمیر میں سال کے سب سے بڑے دہشت گردانہ حملے پر 20 منٹ آگے تھا۔ پھر گوسوامی مبینہ طور پر اپنے چینل کی کوریج پر کہتے ہیں کہ اس حملے پر ہم جیت گئے ہیں۔