پرینکا گاندھی نے ٹیومر متاثرہ بچی کو چارٹر جہاز سے علاج کے لئے دہلی بھیجا

کانگریس کی جنرل سیکریٹری پرینکا گاندھی کے اندر موجود ماں اس وقت سامنے آئی جب انہوں نے ٹیومر سے جوجھ رہی الہ آباد کی ایک بچی کی مدد کے لئے تمام انتظامات کئے ۔ بچی کے والدین نے پرینکا گاندھی سے جمعہ کو رابطہ کیا اور ان کے سامنے بچی کا علاج نہ کرا پانے کی پریشانی کا اظہار کیا ۔ والدین کی پریشانی سن کر پرینکا گاندھی بری طرح ہل گئیں اور انہوں نے فورا بچی کے علاج کے لیے انتظاما ت کئے۔

پرینکا گاندھی نے فورا اپنی پارٹی کے رہنما راجیو شکلا، ہاردک پٹیل اور اظہر الدین سے رابطہ کیا اور انہیں بچی کو دہلی میں علاج کے لئے لے جانے کے لئے انتظامات کرنے کی ہدایت دیں ۔

راجیو شکلا نے بچی ، اس کے والدین ، محمد اظہر الدین اور ہاردک پٹیل کو جہاز سے دہلی کے لئے روانہ کیا اور خود بعد میں ٹرین سے دہلی آئے ۔ کانگریس رہنما جتیندر تیواری کے مطابق پرینکا گاندھی دہلی میں اس بچی کے علاج کا ایمس میں پورا خیال رکھیں گی ۔