پرینکا گاندھی نے بلونی کو دی نئے گھر کی مبارکباد اور جلد صحتیابی کی دعائیں

سیکیورٹی کی وجہ سے کانگریس کی جنرل سیکریٹری پرینکاگاندھی ایک لمبےوقت سے دہلی کے 35 لودھی اسٹیٹ میں رہ رہی تھیں لیکن حکومت نے ان کویہ مکان یکم اگست سے پہلے خالی کرنے کے لئے کہاتھا جو وہ کرنے جا رہی ہیں۔یہ مکان اب بی جےپی کے رکن پارلیمنٹ انل بلونی کوالاٹ ہوا ہے۔پرینکا گاندھی چاہتی تھیں کہ مکان خالی کرنے سےپہلے وہ اس مکان میں نئے آنے والے کےساتھ چائے پیئں ۔

پرینکا گاندھی نے اس کے لئے انل بلونی کودعوت نامہ بھیجاتھا جس کے جواب میں انل بلونی نے ان کا شکریہ اداکرتے ہوئے تحریر کیاکہ کیونکہ وہ ابھی اپنی بیماری کاعلاج کرا کر ممبئی سےلوٹے ہیں جس کی وجہ سے وہ آئیسولیشن میں ہیں اس لئے وہ نہیں آسکتے۔بلونی نے اسی کے ساتھ پرینکاگاندھی کوپیشگی کھانے کی دعوت دے دی ہے ۔بلونی نے کہا کہ جب وہ مکان میں منتقل ہو جائیں گے تو وہ چاہیں گے کہ پرینکاگاندھی اپنے اہل خانہ کے ساتھ ان کے گھر کھانا کھائیں جس میں وہ اترکھنڈکے خاص کھانوں کاانتطام کریں گے جیسے مانڈوے کی روٹی، جھنگورےکی کھیر،پہاڑی رائتا،بھٹ کی چٹکانی وغیرہ ۔

بلونی جن کو کینسر بتایا جارہاہےان کی طبعیت کے بارے میں جان کر پرینکاگاندھی نے انہیں فون کیا اور ان کےصحت کے بارے میں دریافت کیا۔انہوں نے ٹویٹ کے ذریعہ یہ بات شئیر کی’’میری انل بلونی اور ان کی اہلیہ سے بات ہوئی میں ان کی صحت اور خوشحالی کے لئے دعا کرتی ہوں۔‘‘ انہوں نے مزید لکھا کہ انہوں نے بلونی کو نئے گھر کی مبارکباد دی اور اس امید کا اظہار کیا کہ اس گھر میں ویسی ہی خوشیاں ان کو ملیں جیسی ان کے خاندان کو ملی ہیں۔

واضح رہے کانگریس رہنما کو وزارت برائے شہری ترقیات نےسرکاری گھر خالی کرنے کے لئے یکم اگست تک کا وقت دیا تھا ۔ پرینکاگاندھی کی کیونکہ ایس پی جی سیکیورٹی ہٹا لی گئی ہے اس لئے وہ اس سرکاری رہائش کی اہل نہیں رہیں جبکہ حکومت کے سیکیورٹی کم کرنے کے فیصلہ کو لے کر سیاست کےگلیاروں میں سوال بھی اٹھے ہیں۔اب پرینکا گاندھی کوزیڈ پلس سیکیورٹی ملی ہے۔